Prøv frisbeegolf på Fogn i helga!

Ei gruppe lokale frisbeegolfspelarar gjekk ein runde på banen tidlegare i veka, då ein berre hadde pinnar som “korger”.

Som vi kunne lese om i Aftenbladet denne veka, har interessa for frisbeegolf skutt i vèret under koronapandemien. Frisbeegolf er ein sport alle kan meistra, den tar ikkje lang tid, og den kostar ikkje mykje å halde på med. Det er i tillegg ein “koronavennleg” aktivitet ute i det fri, og det er ingen problemer med å halde avstand til kvarandre.

Det vert for tida arbeida med å få til ein permanent frisbeegolfbane på Fogn. Ein bane med 6 “skikkelege” korger koster omlag 40 000 kroner, så det er lurt å gjera eit godt forarbeid og litt “research” før ein set i gong med ei slik investering.

På bakgrunn av dette er det sett opp ein midlertidig frisbeegolfbane på Sæbø denne helga. Korgene på banen er mellom anna lånt av Fogn oppvekstenter, og dei er lova returnert til skulestart på måndag. Difor må dei som vil prøve banen gjere det anten laurdag 1. mai eller søndag 2. mai.

Kjør inn på Sæbøvegen og parker ved drivhuset til Jostein og Merete, altså på turstiparkeringsplassen. Gå vegen nedover mot Bøvågen, og ta gjerdeklyvaren til venstre like nedanfor huset til Anne og Håvard. Deretter kan ein berre gå rett opp til næraste høgspentmast, der utkaststaden er. Her står det også ein kasse med diskar (frisbeear) som ein kan låne. Husk å legge lånte diskar tilbake i kassen etter bruk.

Alle som vil er velkomne til å spele frisbeegolf!

Under ser de banekart, og deretter eit par bilete frå utkaststaden, og den nemnde gjerdeklyvaren ein må over på vegen opp dit.

Nytt hurtigbåtanløp til sommaren

I det siste har det vore mykje “skriverier” om kutt i hurtibåttilbodet i Ryfylke, grunna behov for innsparingar framover. Denne saka er i det politiske systemet, og det er ikkje avklart kva for løysing ein ender opp med.

Difor er det ekstra kjekt å kome med ei aldri så lita gladsak knytta til nettopp hurtigbåt! Frå og med 24. juni får nemleg Fogn eit nytt hurtitbåtanløp. Det er snakk om båten som måndag-torsdag går frå Judaberg kl. 18.50, og er i Stavanger kl. 19.35. Denne båten vil snart byrje å gå innom Fogn dersom det er passasjerar til staden, eller dersom ein ringer og bestiller båten, altså eit såkalla b-anløp. Dette er særs gledeleg, både med tanke på kommunikasjon frå Judaberg, og for dei som vil reise til Stavanger ein kveld. Båten kjem til å stå i ruta som 19.00b frå måndag til torsdag.

Det er Arnstein Bøe som igjen har vore aktiv når det kjem til hurtibåtrutene, og effektiv utnytting av desse. Han har vore i kontakt med Kolumbus, og fått ordna dette nye tilbodet, og vi takkar Arnstein for den gode jobben han har gjort og gjer i denne samanheng!

Ny turstitrasè frå kyrkja til Ørnekula

Turstilaget under grendalaget hadde eit dialogmøte med grunneigerane på Fogn tidleg i mars. I dette møte kom det blant anna fram eit ønske om å endre trase’en frå kyrkja til Ørnakulå. Løypa er blitt flytta frå Varland via Varhaug, til å starte frå kyrkja via Bøhaugen og rundt Varhaug via den gamle «Akstervegen» før den kjem inn på stien igjen ca ved Torvmyra og følger så merka sti videre til Ørnakulå eller ein kan gå videre mot Høgaste og Peråsen. Den nye turstien er fin og lett å gå. Dei som vil kan fortsatt ta seg ein avstikkar oppom Varhaug frå austsida.

Under ser de ein “fortfilm” av den nye turstien.

Referat frå Helselaget sitt årsmøte 2021

På grunn av koronasituasjonen blei årsmøtet avholdt 29.mars med berre leiar Oddbjørg Måland og nestleiar Ingeborg Bø Rolfsen til stades. 

I samsvar med regelverket blei årsmøtepapira sendt til medlemmane i forkant av årsmøtet. 

På dette fekk med følgjande tilbakemeldingar:

- Kristine Bø spela inn forslag om at Helselaget bør arrangera fellestur èin gong per månad for alle som vil.

- Sølvi Østhus har meldt seg som fast hjelpar ved tilstellingar kor me treng fleire hender, til dømes taco-middagen og førjulsfesten for pensjonistane.

Val:

Som medlemmane kjenner til lukkast me diverre ikkje med å få nye medlemmer til styret. Me vel likevel å gå vidare med berre tre medlemmer i styret. 

 Igjen i styret:

- Oddbjørg Måland, leiar

- Ingeborg Bø Rolfsen, kasserar

- Isabelle Kvamsø, sekretær 

Ut av styret:

- Gunnhild Hovda Grønås

- Ingunn Sandanger

- Elisabeth Leiros

På val:

- ingen

Dette kan bety ein reduksjon i arrangementa til Helselaget.

Med dette er innkalling, årsmelding, rekneskap, val og handlingsplan godkjent.

Vidare bestemte styret:

- å «investera» i fire nye postkassar til turbøkene. Me vil ha postkassar i plast som er mykje betre egna enn dei gamle og godt brukte postkassane me har no.

- Å auka beløpet til kjøp av gåvekort i samband med den årlege trekninga i turbøkene. Ifrå totalt 700 kroner til 1000 kroner.

Tre vinnarar blei trekt i turbøkene:

1. premie Liv Sangedal

2. premie Ottar Sandanger

3. premie Trond Arne Borgemyr

Dei tre heldige vinnarane får gåvekort ifrå Finnøy blomster og interiør som kan hentast på Joker Fogn

Avlyst dugnad på lørdag:(

Fogn IL inviterte eigentleg til dugnad på joggeløypa rundt fotballbanen på laurdag 17. april. Dugnaden er no avlyst grunna strenge koronatiltak i Stavanger kommune.

Jakob Bø, Fogn IL

Det går mot dagsturhytte på Fogn!

Før påske skreiv vi om at grendalaget hadde kome med forslag om å plassere ei dagsturhytte på Fogn, nærare bestemt i nærleiken av Fogn sin høgaste topp, Ørnakulå. Vi kan no melde om at dette prosjektet ser ut til å “gå vegen”, eller som Øyposten slår fast: “Ørnakulå på Fogn får dagsturhytte”!

Innstillinga til administrasjonen i Stavanger kommune er nemlig å gå for to dagsturhytter, slik at det blir plassert ei hytte både på Kuneset på Hundvåg, og Ørnakulå på Fogn. På denne måten vert det både ei hytte ved sjøen og ei hytte på ein topp med utsikt over store deler av kommunen!

Administrasjonen skriv i si innstilling i dei politiske sakspapira at Ørnakula geografisk ligg midt i øylandskapet i Stavanger kommune. Det er bra at ein kan nå toppen frå ulike startpunkt på øya, slik at ein ikkje er avhengig av bil for å kunna ta turen. Eit anna moment dei vel å trekka fram, er at Ørnakula, i tillegg til å vere lett tilgjengeleg, ligg langt unna busetnad og lysforureining. På kveldstid får ein difor krystallklar utsikt til ein flott stjernehimmel, som på biletet under, som er knipsa på Ørnakulå i januar i år:

På Fogn har det i det siste vore uvanleg høg aktivitet i turstinettet. Både fastbuande og besøkande er ute på tur, både for å få trim og gode naturopplevingar, men også for å sanka trimpoeng i konkurransen “Finnøy Topptur 2021”. Av alle dei registrerte turmåla i konkurransen er det dei tre toppane på Fogn, Peråsen, Domfjellet og Ørnakulå, som har fått registrert klart flest besøk!

No ser vi fram til at dagsturhytta til Fogn blir banka gjennom i diverse politiske utval, første spadestikk blir tatt, og hytta kjem på plass! Då har vi stor tru på at enno fleire får koma og sjå kva for ein flott natur Stavanger kommune har å by på, berre ein dagstur unna!