Berre ei veke til Tour de Fogn, meld deg på!

Fredag 23. juni startar den 7. utgåva av Tour de Fogn! Mange har alt meldt seg på, men det er framleis plass til fleire! Gå til meir informasjon og påmelding ved å klikka HER.

Kristian Sandanger Iversen har laga ein "påmeldingsfilm", som kan sjåast ved å klikka HER. Filmen viser klipp frå mange tidlegare utgåver av rittet, og det er ingen grunn til å tru at det skal bli mindre kjekt denne gongen! I år er det fleire spenningsmomenter. Kjem det til å kome nokre "kanoner" som Inge Holla, som meldte seg på og vann soleklart i fjor? Kjem Joker-laget, som de ser bilete av over, til å vere komplett med samtlige fire frå Fogn handel? Vil deler av rittet gå på grus, sidan vi ikkje veit når asfalteringsarbeidet rundt øya vert ferdigstilt? Og vil det endeleg bli ny rekord i talet på deltakarar i dameklassen?

Bli med på (eit av) sommarens vakraste eventyr, Tour de Fogn!

Glimt frå søndagsskuleavslutninga

Søndag 11. juni var det avslutning for søndagsskulen og søndagsringen på Fogn. Igjen hadde Helga og Ståle Østhus stilt sitt naust til disposisjon, og folk kom dit, både til lands og til vanns! Dei omlag 50 personane som hadde møtt opp, fekk sjå skodespel om den bortkomne sonen, syngja barnesongar og grilla og leika seg. Vèret må kunne seiast å ha vore heilt OK, særleg med tanke på at regnet venta heilt til arrangementet var neste slutt før det byrja å dryppa. 

Under er nokre fleire bilete:

Avslutningar i helga

Både guttelaget og søndagsskulen har opne arrangement som markerer sommaravslutning denne helga. 

Friluftsbasar fredag 9. juni kl. 18.00
Guttelaget sin friluftsbasar plar å vera på plenen utanfor bedehuset. Dersom det er dårleg vèr, flyttest basaren innandørs. Her vert det andakt av Magne Vatland, sal av pølser, lappar, kaffi og brus, i tillegg til loddsal med trekning av ulike gevinstar. 

Søndagsskuleavslutning søndag 11. juni kl. 14.00
Søndagsskulen og søndagsringen har sin avslutning på Selvåg, ved naustet til Helga og Ståle Østhus. Parkering ved hønsehuset deira. 
Det blir andakt, aktivitetar og grilling av medbrakt grillmat.

Alle er hjarteleg velkomne på begge arrangementa!

Veg stengt grunna asfaltering

Mange har nok høyrt nyhenda om at det skal koma ny asfalt rundt Fogn i løpet av våren/sommaren. No står prosjektet for tur, noko som gjer at det vil verta litt vanskelegare å køyra rundt Fogn framover, men så vil det altså bli mykje betre etterkvart.

I første omgang informerer Risa om at dei skal mala opp den gamle asfalten på strekningen Runestad - Sæbø. Arbeidet startar tysdag 6. juni, og vil ta ca. 2 veker. Veien blir stengt på forskjellige plassar mellom Runestad og Sæbø i perioden fram til St.Hans. For meir info om stenging av veg, ny asfalt osv, kan ein ta kontakt med Reidar Roda (404 04 169).

NB! Hugs folkemøtet torsdag 1. juni!

Finnøy kommune har no lagd planprogrammet for arbeidet med den nye og siste kommuneplanen ut på høyring med frist 14. juni 2017.

Planprogrammet er å sjå på som rammen og mandatet for det arbeidet me skal halde på med dei neste to åra fram mot ferdig kommuneplan.

Me ønskjer at flest mogleg blir med på arbeidet som no startar opp, og vil difor ha folkemøter saman med grendalaga på øyane.

Møtet på Fogn vert i foajeen på oppvekstsenteret, torsdag 1. juni klokka 19.00-20.30.

Møtet vil starta med informasjon og presentasjon av planprogrammet, før det vert opna for spørsmål frå salen. Det vert servert kaffi og noko å bita i.

Alle er velkomne!

Med beste helsing
Finnøy kommune

Plakat for alle møtene i kommunen finn de ved å klikka her.

Bli med på Tour de Fogn!

Helga 23.-25. juni går sykkelrittet Tour de Fogn av stabelen for 7. gong, og i år vil vi gjerne at DU skal vera med! Tour de Fogn er rittet for alle, anten du aldri har vore med i eit sykkelritt før, eller om du er ein erfaren syklist med konkurranseerfaring! Her er det eigen dame- og herreklasse, i tillegg til seniorklasse for dei over 60 år.

I fjor opna vi opp for ein eigen el-sykkelklasse, i og med at denne typen syklar byrjar å verte nokså vanlege langs vegane, også på Fogn. Diverre var det ingen som meldte seg på med el-sykkel, men de får sjansen igjen i år! Hugs i så fall på å skrive dette i kommentarfeltet ved påmelding.

NB! Racersykkel er ikkje lov, aldersgrensa er 16 år, og hjelm er påbudt. 

Påmelding skjer på skjemaet under. 

Det kostar 100 kr per deltakar, kontant betaling/VIPPS ved oppmøte på fredagen. Under fylgjer litt informasjon om dei ulike dagane:

Etappe 1 - Prolog med individuell start

Tid: Fredag 23. juni kl. 18.30
Start og mål: Pakkerietet

Etappen går frå pakkeriet, over flata til misjonshumpen, og tilbake. Syklistane startar ein og ein, med eit minutts mellomrom. Den som fullførar på kortast tid, vinn etappen og leiar rittet.

Etappe 2 - Landeveisritt med fellesstart og barneritt

Tid: Laurdag 24. juni kl. 14.30
Start og mål: Fogn oppvekstsenter

Etappen går to rundar rundt Fogn, og feltet køyrer i retning Varland. Alle startar samla, og den som kjem først i mål (Fogn oppvekstsenter) etter to rundar, har vunne etappen. Den som samla sett har best tid etter dei to første etappane, leiar rittet.

Når alle har kome i mål, er det tid for barneritt. Då kan barn i alle aldrar koma med sykkelen sin, og sykla ulike løyper, alt etter kor gamle dei er. 

Etappe 3 - Klatreetappe med fellesstart

Tid: Søndag 25. juni kl. 12.30
Start og mål: Fogn oppvekstsenter (start), Kyrkja (mål)

Syklistane startar på Fogn oppvekstsenter, og syklar i retning Varland. Deretter går turen via Sæbøkrossen til Sørvåg og Runastad, før dei svingar av og syklar opp bakken til Høgaste. Frå Høgaste går turen forbi kyrkja, før dei syklar ein heil runde rundt Fogn, og har målgang ved kyrkja. 
Den som samla sett har best tid etter tre etappar, vinn rittet!