Nytt båtførarkurs på Fogn, laurdag 18. juni!

Tidlegare i vår var det eit båtførarkurs på Fogn, i regi av Jarleiv Bjørklund. Kurset vart fullteikna, og alle som deltok besto eksamen, slik at vi no har ein heil del fleire "sertifiserte" båtførarar på Fogn! Fleire har kome med ynskje om eit nytt kurs, og no har Jarleiv datoen klar: Laurdag 18. juni!

Vil du vere med på kurset, melder du deg på til Jarleiv via sms på 480 06 479. Under er meir informasjon om kurset:

------------------------------------------

I og med at vi bur på ei øy med vatn på alle kantar, er det kjekt å kunne ferdast i båt på sjøen. Utan båtførarbevis kan ein i dag berre føre ein mindre båt med liten motor. Er båten over 8 meter, eller motoren over 25 hk, må ein ha båtførarbevis , så lenge ein er født etter 1. januar 1980. Difor er det blitt meir og meir vanleg med båtførarkurs, der ein får intensiv opplæring, med påfylgjande eksamen. 

Jarleiv Bjørklund er overstyrmann, og sertifisert til å ha slike kurs. Han kjem til Fogn ein laurdag 18. juni for å gjennomføra 6 timars intensiv opplæring, der den siste timen går med til eksamen. Kurset kostar 1500,- og i tillegg kjem det ei eksamensavgift på 685,- 

På kurset får du mellom anna læra om:

• Navigering
• Godt sjømannskap
• Signaler for sikker navigering
• Ord og uttrykk brukt på sjøen
• Sjøens lovar og regler
• Grunnleggande navigasjon
• Sjøkart
• Kompass
• Sjømerker
• Fyr og lykter
• Bruk av instrumenter og seilas i kartet

Kurset vert gjennomført i eit klasserom på oppvekstsenteret, og ein tek altså eksamen direkte etter kurset. Jarleiv melder også om at kurset har ein "bestått garanti".

Felles jente- og guttelagsavslutning!

Måndag 2. mai var det klart for felles avslutning for jente- og guttelaget på Fogn. Desse laga er eit tilbod for jenter og gutar frå 2. klasse og oppover, men i og med at måndag var siste samling før hausten, vart også 1. klassingane invitert til å vere med! Omlag 30 born møtte opp på bedehuset, der dei fekk med seg andakt av Jon Olav Østhus, før jentelagsleiarane stilte med pølser, saft og brownies. Deretter var det tid for ulike leiker i hovudsalen, før vi til slutt fekk knipsa eit bilete av den flotte buketten som var samla!

Sjølv om jente- og guttelaget no har teke ferie, så gjenstår det framleis eit arrangement i deira regi før sommaren, nemleg den årlege friluftsbasaren arrangert av guttelaget. Denne basaren var eigentleg sett opp fredag 3. juni, men er no flytta ei veke nærmare sommaren, til fredag 10. juni klokka 18.00.

Tekst og foto: Håvard Østhus

Årets konfirmantar på Fogn

Laurdag 30. april var det konfirmasjonsgudsteneste på Fogn. Tradisjon tru var det fotografering av desse og presten på "kyrkjebakken", og vi har fått tilsendt eit foto som Odd Inge Austevoll har knipsa. 

Frå venstre: Ingrid Marie Bøe, Adrian Lode, Rebecka Bø Rolfsen, Marie Sofie Østhus, Terje Engstrøm, Tom Arne Straumstein, Karl Magne Frafjord, Tor Olav Bø Måkestad og Robin Gjengedal Torgersen.

Tur til Karmøy

Eldresenteret arrangerer busstur til Avaldsnes på Karmøy måndag 9. mai. Me reiser med ferja til Nedstrand kl 08.00 og kjem heim over Arsvågen 18.15. Det blir middag på Nordvegen Historiesenter, der me m.a. møter både Gyda og Harald Hårfagre. Det blir og omvisning i Olavskyrkja. Pris: ca 400 kr (avheng litt av kor mange som blir med.)

Det er framleis ledige plasser i bussen, så har du lyst, er du velkommen til å bli med. Ta kontakt med Anne Marie (47287445) eller Reidunn ( 90508993) før 4. mai.

Klart for felles søndagstur i helga!

På søndag 1. mai er det klart for ein ny fellestur! Starten går frå butikken klokka 14.00, og første mål er Osvald-dammen. Finn vi nokre rumpetroll her tru? Vi går etterkvart vidare over Peråsen, før vi set kursen mot "uteplassen" til speidaren/barnehagen. Her vert det laga bål, slik at dei som vil kan grilla og ta seg ein drøs.

Vi håper at så mange som mogleg vil vera med på denne kjekke turen!

Arr: Fogn IL, Helselaget og Speidaren 

Søndagsskuletur

Søndagsskulane i Finnøy hadde ei kjempeflott samling på Sjernarøy oppvekstsenter søndag som var.
Me blei velsigna med nydeleg vèr. Sola skein og det var ganske så stilt på skuleområdet denne dagen.
 
Rundt 170 stk store og små var med på denne samlinga. Kristen Helgøy henta oss tilreisande med Helgøy Glimt på dei forskjellige kaiane, og sette oss i land ca 100 m fra skulen. Lettare og finare tur kunne me ikkje fått.
 
Leiarane i Finnøy Sundagsskule stod for organisering, bibelfortejing, song og grilling.
Sjernarøy Sundagsskule (Barnelag) hadde ansvar for plass, kaffi, gode kaker og mange grillar! Talgje og Fogn Sundagsskule stor for sporleik.
 
Ungane leika på det flotte skuleområdet, medan vaksne anten leika med, eller slo av ein prat og tok seg ein kopp kaffi i solveggen.
 
Dette må seiast å være ein særs vellykka dag for både liten og stor!
Ekstra takksame var me då me oppdaga snøfnugg dalande i lufta, i det me gjekk om bord i Helgøybåten på returen, og kunne snu oss konstantera skikkelige snøbyga over Sjernarøyane då me var vèl heime.
 
Takk til alle som var med på turen fra Fogn!
 
- Fogn Søndagsskule og Søndagsring -