Surt poengtap i serieopninga!

Fogn - Kvitsøy: 2-2 (1-0). Når du leier både ein og to null, og slepp inn utlikningsmålet på overtid, så må ein få lov til å seie at det er eit surt poengtap. Slik vart det for Fogn i serieopninga av 7. divisjon avdeling 2, 2016.

I skiftande vèr, med alt frå sol til sludd, barka Fogn og Kvitsøy saman til årets første seriekamp. På førehand var det vanskeleg å seie kven som var favoritt, mellom anna grunna at Fogn ikkje hadde spelt ein einaste treningskamp, og heller ikkje hadde hatt meir enn ei trening på graset før Kvitsøy kom på besøk. Samstundes hadde ikkje bortelaget imponert i treningskampar i vinter, så det var duka for ein open kamp!

Utover det skiftande vèret var det flotte rammer rundt kampen! Mange hadde møtt opp, det lukta vafler frå kiosken som no står fint plassert blant publikum ved midtstreken, og både speakerar (Kristian S Iversen og Jørgen Bø) og musikk var på plass!

Førsteomgangen bølga fram og tilbake med sjansar til begge lag. Tempo og kvalitet var nok så som så, men fleire av sjansane var i alle fall store og gode, sjølv om ingen av desse vart omsett i skåringar. Ikkje før på overtid av første omgang. Då fekk Fogn corner, og spelande trenar Jakob Bø sendte fram det som var av "luftskyts", for no skulle Fogn ha eit mål før pause. Som sagt, så gjort. Johannes Hovda jr slår ein perfekt corner til Jakob på bakre stolpe. Sistnemnde stig til vers og stangar inn 1-0 til heimelaget, og han har ikkje meir enn landa før dommaren bles av til pause, med heimelaget i leiinga!

I andre omgang fekk Fogn fordelen av medvind, noko som nok bidrog til at dei blåkledde styra første halvdel av omgangen. Likevel måtte dei ha hjelp for å få sett inn det andre målet, då Kvitsøy sin høgreback plasserte ballen heilt inne ved stolpen, etter at Ole Jakob Kjølvik hadde slått eit fint innlegg frå si høgreside, 2-0!

Framleis var det Fogn som styra kampen, men Kvitsøy var også farleg frampå nokre gonger. Eit kvarter før slutt fekk dei også ein corner, som vart utnytta på beste måte. Heimelaget "sov litt" og glapp i markeringane, slik at ballen først vart stussa vidare av ein Kvitsøyspelar, før den traff ein Kvitsøyfot, og vart forlenga vidare inn i mål, 2-1.

Ikkje lenge etter vart Kvitsøy redusert til 10 mann, då ein nokså frustrert midtstoppar, som hadde vore framme på ein corner, sparka ned Jakob Bø som var i fint driv framover på ei kontring. Likevel, med 10 mann og med motvind i fjeset, så skulle Kvitsøy få si utlikning.

Dommaren hadde nettopp gitt beskjed om at 3 minutter var lagt til, då Sigve Bø hamna bak ein Kvitsøyspelar inne i Fogn sitt 16-meterfelt. Dette stoppar ikkje Sigve frå å sette inn ei takling, og vips, så vart det straffe til bortelaget. Straffa vert sett sikkert ned til høgre for keeper Trond Egil Sivertsen, som elles gjorde ein veldig god figur i det som var hans 200. kamp for Fogn.

Resten av overtida vart eit stormløp mot Kvitsøy sitt mål, men heimelaget kom ikkje nærare enn eit par gode sjansar, før dommaren bles av til poengdeling, 2-2. 

No ventar Lura 2 på bortebane på tysdag for Fogn. Lura 2 vann sin opningskamp 2-1 på bortebane, så det kan fort vera eit godt lag Fogn skal opp mot i neste kamp.

Sjå fleire bilete frå kampen ved å scrolla ned under kampfakta! Bileta er knipsa av Kristian Sandanger Iversen, med unnatak av det siste biletet, som er knipsa av Janne Aano Bø. Takk for bileta!

KAMPFAKTA:

Fogn sitt lag:

Trond Egil Sivertsen
Martin Østhus
Ivar Opsal
Sigve Bø
Lars Olav Bøe
Vadim
Jakob Bø
Johannes Hovda jr
Ole Jakob Kjølvik
Trond Arne Borgemyr
Håvard Østhus

Benytta reservar:
Malvin Skartveit
Ørjan Klev Ladstein
Andreas Hagenes Bøe

Fogn sitt mål: Jakob

Fogn sine assists: Johannes og Ole Jakob

Gule/raude kort: Ingen!

Seriestart i helga!

Laurdag 23. april klokka 14.20. Det er berre å sette av tidspunktet, for då er vert 7. divisjon avdeling 2 sparka i gang på Fogn stadion! Og det er ikkje kven som helst som kjem på besøk for å spela mot A-laget denne laurdagen. Det vert ein ekte øyduell mellom dei blåkledde frå Fogn og dei kvitkledde frå Kvitsøy! 

Nytt av året er at kiosken har blitt flytta slik at den no er plassert midt blant publikum på sida av banen. Her er det også lagt inn straum slik at det vert sal av nysteikte vafler og kaffi, i tillegg til sjokolade under seriestarten på laurdag! 

Så må det nemnast at det er mykje spenning knytta til denne kampen. Kvitsøy har, etter kva ryktene seier, spelt fleire treningskampar, utan dei heilt store resultata. Samstundes har ikkje Fogn spelt ein einaste treningskamp, og grasbanen har heller ikkje vore nytta før på treninga sist tysdag. Fogn har også mista ein av stjernespelarane frå i fjor, nemleg Rasmus Robson Skartveit, som har meldt overgang til Siddis i 5. divisjon. 

Det er altså umogeleg å seie på førehand kva som kjem til å skje i seriestarten, så det tryggaste er nok berre å møte opp når mennene frå Kvitsøy og Fogn barkar saman til kamp!

Siste frist for påmelding til søndagsskulefest

I fjor vår fekk søndagsskulen på Fogn besøk frå dei andre søndagsskulane i kommunen. I år skal denne same søndagsskulefesten arrangerast i Sjernarøyane, søndag 24. april. Det er sett opp båttransport med Helgøy Skyssbåt, noko som gjer at ein må melda seg på til turen. Frist for påmelding er i dag, 19. april.

Sjå elles plakaten under for informasjon:

#godefogn

Dei av lesarane som er på Instagram, veit gjerne kva ein hashtagg (#) er for noko. På godt norsk heiter det ein emneknagg, og er ein måte å merka bilete på, slik at bilete som passar inn i same kategori, kan visast som eit album eller i eit digitalt galleri. No er det etablert ein felles hashtagg for positive bilete frå Fogn, nemleg hashtaggen #godefogn. Bilete som vert merka med denne hashtaggen kjem opp på TV-skjermen på butikken, der dei fem siste bileta i denne kategorien vil visast. Det må også nemnast at det berre er bilete som er publiserte frå ein open konto (altså ikkje ein konto der folk må sende forespørsel for å kunna sjå bileta) som vil verta synlege på skjermen.

Instagrambrukarar kan også sjå etter hashtaggen #godefogn i Instagramprogrammet på telefonen sin. Her vil dei sjå bilete som er lagt ut frå opne kontoar, i tillegg til dei bileta som deira "Instagramvener" har lagt ut merka med #godefogn.

Då er det berre å knipsa flotte bilete frå Fogn og merka desse med #godefogn!

Rapport frå årsmøte i Fogn grendalag

Onsdag 6. april var det årsmøte i Fogn grendalag på oppvekstsenteret. Omlag 25 personar hadde møtt opp, mellom anna for å høyre kåseri av Frank Pedersen frå "Gledesfabrikken Pedersen". Pedersen, som ser på seg sjølv som ein slags julenisse, fortalte om livet sitt, og om korleis dei ulike vala han hadde gjort undervegs hadde ført han fram til dit han er i dag. Og Pedersen fortalte, med ein god dose humor og glimt i auga, at han ikkje var i mål enno, men at kanskje nettopp vegen var sjølve målet for han.

Sjølve årsmøtedelen var nokså raskt unnagjort. Kristoffer Østhus la fram årsmeldinga for grendalaget, medan rekneskapen vart presentert av Merete M Kindingstad. Begge vart godkjente utan kommentarar. 

I år var første gong den nye ordninga med valnemnd var i funksjon på årsmøtet, og det kunne virka som om valnemnda hadde gjort jobben sin. Deira innstilling gjekk i alle fall igjennom på alle punkter, og styret for det komande året ser difor slik ut:

Kristoffer Østhus (leiar, valt på årsmøtet, 1 år att)
Merete Meling Kindingstad (1 år att)
Harald Bøe (1 år att)
Kathrine Flesjå (1 år att)
Joar Sandanger (valt på årsmøtet, 2 år att)
Arnstein Bøe (valt på årsmøtet, 2 år att)
Håvard Østhus (valt på årsmøtet, 2 år att)
Arne Straumstein (varamedlem, 1 år att)
Ingeborg Bøe Rolfsen (valt på årsmøtet, 2 år att)

Det vart stilt spørsmål ved den spesielle varamannsordninga i grendalaget, der varamedlemmene blir valt for to år om gongen. Leiar noterte seg dette, og vil ta det opp i styret, for så å evt. koma tilbake med eit vedtektsendringsforslag til neste årsmøte. 

Valnemnda ser slik ut for det neste året:

Oddny Kjølvik (1 år att)
Jakob Bø (2 år att)
Øyvind Sandanger (valt av årsmøtet, 3 år att)

Ottar Sandanger vart valt til revisor.

Etter ein liten basardel vart møtet offisielt heva. Men i og med at klokka berre var omlag 20.45,  vart folk sittande att og drøsa. No byrja verkeleg samtalane å gå om Øyfast, kommunestruktur og ferjeruter. Jon Olav Runestad, som var forhindra frå å koma på sjølve årsmøtet, møtte også opp etterkvart, og kunne fortelje litt frå eit møte han denne dagen hadde hatt med samferdselssjef Gottfried Heinzerling. Eit signal derfra var at ferjerutene, som etter planen skal endrast frå mai i år, ser ut til å verta omlag slik som det forslaget fylket sendte ut på høyring mot slutten av 2015. Dette forslaget kan de sjå ved å klikka HER.

Ein fantastisk møteplass!

I ei bygd og på ei øy som denne er det viktig med gode sosiale møteplasser. Ved å lage dette nærmiljøanlegget får vi styrka den møteplassen som bingen og skuleområdet har blitt! 

Slik ordla leiar i Fogn IL, Jakob Bø, seg under opningsfesten for det nye nærmiljøanlegget ved Fogn oppvekstsenter. Og det var nettopp ein god møteplass nærmiljøanlegget var denne søndags ettermiddagen, då omlag 100 personar hadde møtt opp for å vera med når anlegget skulle takast i bruk for første gong. I tillegg til apell frå Jakob Bø, holdt Pål Rune Grønås, på veigne av ansvarsgruppa som har jobba med nærmiljøanlegget, ein takketale der han også fortalte eindel om prosessen som har leia fram til det flotte resultatet ein kunne sjå og prøve i dag. Det er Fogn IL som har vore "primus motor" bak det nye anlegget, og dei har fått støtte frå både Sparebankstiftelsen SR-bank, Gjensidigestiftelsen, forhåndsgodkjenning av tippemidler, fleire lokale bedrifter og enkeltpersonar, i tillegg til villige dugnadshender! Pål avslutta med å slå fast at: "Når vi løftar saman, så får vi til akkurat det vi vil", og nettopp denne haldninga trakk Ordførar Henrik Halleland fram då han fekk ordet like etterpå. Halleland var imponert over det Fognbuen hadde fått til, og han var glad for å kunna erklæra det nye nærmiljøanlegget for opna, og klippa snora, slik at borna kunne sleppe til! På det omlag 160 kvadratmeter store området kan dei boltra seg i eit klatrenett, ein "Supernova" (roterande hjul dei kan sittje, stå, gå og springe på), ei svingstang, to ballanseliner og seks ballar som kan både rotera og svinga frå side til side!

Dei første 10 minutta var det berre borna frå 0 år og opp til og med 3. klasse som fekk bruke leikeplassen, saman med Vidar Skavland frå Talgjefirmaet Rampline, som har levert mykje utstyr, og designa heile leikeplassen. Skavland presenterte og demonstrerte dei ulike apparata, og etter kun kort tid var også eldre born, vaksne og ordførarar med i leiken!

I tillegg til dei ulike programpostane var det servering av marsipankake, frukt, kaffi og brus. Og når vèret etterkvart letta, og sola stakk fram, førte det til at festen varte og rakk i fleire timar!

No står anlegget der, klart til å takast i bruk av både fastbuande og ferierande på Fogn! Under kan de sjå bilete frå anlegget og opningsfesten!