Jula er sungen inn!

Søndag 13. desember vart det arrangert "Vi syng jula inn" i Fogn kyrkje. Salen var rimeleg stappfull av folk som hadde kome for å høyre barnekoret TøfFOGNådig, Fognakoret med solistar, Jenny Graadahl og siste nytt frå misjonsprosjektet ved Jostein Gard. I tillegg var det jo eindel fellessongar, slik at alle fekk bidra til å nettopp "syngje jula inn". 

Det vart ei flott samling med masse fin song og noko som grensa opp mot julestemning for mange! Etterpå var det kyrkjekaffi i kjellaren, der det også kom eit Luciatog av born, for i år fall denne tredje sundagen i advent på sjølvaste Luciadagen!

Under er nokre bilete frå samlinga:

Nissebesøk og graut på butikken!

Laurdag 12. desember inviterte Fogn handel til julegraut i butikken sin lagerbygning. Mange møtte opp, særleg rundt klokka 12.00, då det var varsla at sjølvaste julenissen skulle koma på besøk! Og plutseleg sto nissen i døra med ein sekk full av overraskingar til borna! Han tok raskt plass i den spesiallaga "stolen" av halm, og borna fekk kvar sin godtepose etter ein liten samtale med nissefar der tema var om dei hadde vore snille i år eller ikkje... Elles kan det nemnast at julenissen snakka ei salig blanding av trøndersk og nord-norsk, og ein trengte nok ikkje å vera rakettforskar for å forstå kven som skjulte seg bak det kvite skjegget...

I tillegg til graut og nissebesøk var det sal av juletre denne dagen. Mange hadde forhåndsbestilt tre, og det var også fleire som kjøpte tre på laurdag, så det spørs om ikkje dette er ei ordning som er kome for å bli!

Under er nokre bilete frå den kjekke "seansen":

Juleverkstad på oppvekstsenteret

Torsdag 10. og fredag 11. desember var det igjen tid for juleverkstad på Fogn oppvekstsenter. Juleverkstaden er ein årelang tradisjon, og det er heilt sikkert mange av dei som er føresette til borna i dag, som har både gode minner og fysiske gjenstandar som stammar frå denne førjulsaktiviteten. I år skulle elevane innom fire stasjonar med ulikt innhald. Her var baking av julekaker, snekring av juletre beståande av rekved, liming av mosaikk på glaslykter og sying av ulike filtgjenstandar. Barnehagen kom rundt til stasjonane på torsdagen, ikledd sine Luciakostymer, og delte ut eigenbakte lussekattar. Under julegrauten på fredag var også barnehagen med, slik at heile oppvekstsenteret åt saman i foajeen denne dagen. 

Under er ein fyldig serie med bilete frå eit av høgdepunkta i adventstida for mange Fognbuar!

Vellukka eldrefest i kyrkja!

Onsdag 9. desember inviterte Fogn helselag pensjonistar med fylgje til eldrefest i kyrkjekjellaren. Og at denne festen har blitt svært så populær vart tydeleg gjennom at dei første gjestene kom i god tid før klokka seks, sjølv om festen ikkje skulle starta før halv sju... Då klokka nærma seg det offisielle starttidspunktet var lokalet alt fylt opp av festkledde eldre som lytta til vakre tonar frå "Trekkspelkameratane", koste seg med gløgg, og drøste med kvarandre!

Helselaget, som arrangerer denne festen utan nokon form for inngangspengar, stilte med både middag og dessert, beståande av røykt svinekam og riskrem med ikkje mindre enn tre mandler i. Då maten var eten, skulle eigentleg Jon Arne Helgøy stått for underhaldninga, men han hadde rett og slett mista stemmen, og måtte difor melde avbud (men han har alt lova å gjere det han kan for å stilla neste år..). I Jon Arne sitt fravær vart det Reidunn Østhus som "steppa inn", og fortalte om bakgrunnen for eindel av dei kjende julesongane våre. Det vart også høgtlesing av juleevangeliet, og Fognakoret var med og song fleire songar. Som om ikkje julestemningen alt var god nok, vart det også tid til juletregang før folk etterkvart gjekk kvar til sitt, vel vitande om at no står jula verkeleg for døra!

Under er nokre fleire bilete frå festen og førebuingane til denne, knipsa av Anne Strøm Østhus.


TV-Vest med flott program om Fogn!

Reporter Veronica Simonè Fjeld rapporterer mellom anna frå Joker Fogn i dette programmet. Foto: Skjermbilete frå TV-Vest

Reporter Veronica Simonè Fjeld rapporterer mellom anna frå Joker Fogn i dette programmet. 
Foto: Skjermbilete frå TV-Vest

I august var reporter Veronica Simonè Fjeld og kameramann Tommy Rørvik på Fogn i to dagar for å gjera opptak til ein episode i TV-Vest sin programserie "Øyhopping". Tysdag 1. desember vart programmet frå Fogn sendt på lufta, og vi fekk sjå reportasjar frå både butikken, oppvekstsenteret, museet og ein aldri så liten "hjemme-hos" reportasje frå familien Øyvind og Ingunn Sandanger! Til saman vart dette veldig god reklame for Fogn, og det er berre å dela videoen vidare til folk som enno ikkje har fått sjå kor flott vi har det her! Programmet er nemleg lagt ut på nett av TV-Vest, og du kan sjå det ved å klikka nede til venstre i videovindauget under!

PS! I byrjinga av programmet seier reportar Veronica at det tek omlag ein halv time med ferja til Fogn. Vi som bur her veit at turen er unnagjort på eit lite kvarter, så ikkje la reisevegen skremma dykk...

Knusing av lecablokker i kyrkja på fredag!

Ja, det kan vere at det er ei spesiell overskrift, og ja, det kan godt vere at dette med knusing av lecablokker ikkje er det viktigaste som skal skje i kyrkja på fredag. Men overskrifta fekk nok eindel til å klikke seg inn på denne saka, så då kan de like godt lese litt meir om det som skal føregå!

"Konsert og drøsekveld" har Torolf Nordbø kalla samlinga som startar i Fogn kyrkje, fredag 4. desember klokka 20.00. Torolf sjølv, som kanskje er best kjent i rolla som "Han innante" kjem til å bidra med song, gitar og munnspel, saman med vår eigen Dag Olav Sæbøvåg som også stiller med song og gitar! Men ingen av desse har, så langt vi veit, planar om å knusa lecablokker. Det har derimot danske Øyvind Borgsø, som tidlegare var gjengkriminell i Oslo og på topp innan kampsport. I dag er han diakon og veiledar i bøn og kristen meditasjon. Torolf vil ha ein samtale med Øyvind om "reisa hans", og Øyvind vil i tillegg knusa lecablokker for oss!

Inngongspengar: 150 kroner for vaksne, born (5-17 år) betalar 50 kroner. Maks 300 kroner per familie. 

Alle er hjarteleg velkomne!