Sol, stemning og salsrekord!

Med sol frå skyfri himmel, ein heil haug med folk og skikkeleg påskestemning utafor butikken, arrangerte Fogn IL sin årlege basar på påskeafta. Salet starta alt på onsdag, då loddselgarane gjekk frå dør til dør og selde for omlag 30 000 kroner, noko som gjorde at "basarnestorane" hadde godt håp om ny inntektsrekord. I fjor sette nemleg idrettslaget ny rekord på rett over 60 000 kroner, og då fekk dei ikkje inn så mykje pengar på onsdagssalet. 

På laurdag starta dei opp alt klokka ni med loddsal, i tillegg til gratis kake, lappar og kaffi. Det var sett opp mange bord på utsida av butikken, slik at folk kunne nyta dagen der i solskinet, noko fleire nytta høve til. Like før trekningen, som skulle vere klokka 14.00, var det litt program frå "scena" (ein traktortilhengjar". Idrettslagets leiar, Heidi Bø Sangedal informerte litt frå idrettslaget sine aktivitetar, Basargeneral Øyvind Sandanger snakka litt om Fogn.org, og born frå oppvekstsenteret deltok med både song og dans!

Sjølve trekninga vart gjennomført utan den største dramatikken, og dei mange gevinstane såg ut til å bli godt fordelt i folkemassen, som no var samla på parkeringsplassen. Og sluttresultatet til idrettslaget? Ny rekord også dette året: 72 000 kroner!

Sjå fleire bilete i serien under. 

Tekst: Håvard Østhus, Foto: Karl Fredrik Måland/Håvard Østhus

Det skjer på Fogn i påsken!

Under er ei oversikt over mykje av det som skjer på Fogn i påsken. I tillegg har idrettslaget diverse treningstilbod, sjå kalenderen her på Fogn.org. Dersom det kjem endringar i dei oppsette arrangementa vil også dette kunngjerast på nettsida.

Onsdag 16. april - Loddsal på dørene frå kl. 18.00

Fogn IL kjem rundt på dørene og sel lodd til basaren på påskeaften. Hugs å ta ut kontanter, då dei ikkje tek kort…

Arr: Idrettslaget

Torsdag 17. april - Nattverdmøte på bedehuset kl. 11.00

Skjærtorsdagsmøte ved Håvard Østhus. I tillegg til nattverd vert det andakt, song og vitnesbyrd.

Arr: Bedehusforeningen

Torsdag 17. april - Fellestur til Sulsøy kl. 14.00. NB! Denne turen er flytta til 1. påskedag klokka 14.00 pga dårlege vèrmeldingar...

Oppmøte og parkering ved Olav og Anne May Hovda. På turen, som passar for alle, vert det quiz, frukt og eggkoking. 

Arr: Helselaget, Speidaren og Idrettslaget

Fredag 18. april - Gudsteneste i kyrkja kl. 10.30

Langfredagsgudsteneste ved Anders Kvalevåg. Song ved June Hovda. 

Takkoffer til Opne dører.

Laurdag 19. april - Basar ved butikken kl. 09.00-15.00

Idrettslagets tradisjonsrike påskebasar. Dei sel lodd og gir ut gratis lappar frå klokka 09.00-14.00. Trekning av mange flotte gevinstar klokka 14.00.

Arr: Idrettslaget

Søndag 20. april - Høgtidsmøte på bedehuset kl. 11.00

1. Påskedagsmøte ved Marit og Leif Thingbø med vener frå Kenya. Song ved June Hovda. Kollekt til NLM sitt arbeid.

Arr: Fogn Misjonslag (NLM)

Søndag 20. april - Gudsteneste i kyrkja kl. 18.30

1. Påskedagsgudsteneste ved Terje Engstrøm. Song ved Fognakoret. Nattverd. Takkoffer til misjonsprosjektet.

Hjarteleg velkomen på alt til både fastbuande og besøkjande!

Rekordstor jentelagsbasar?

Jentelagsbasaren på "palmefredag" var sannsynlegvis rekordstor på fleire måtar. Det kom så mykje folk at ein måtte ha mange rader inn i "litlesalen" på bedehuset, og det vart solgt lodd for over 28 000 kroner! I møtedelen fekk dei frammøtte høyre andakt av Lars Skjæveland frå NLM Region sør-vest. Lars er også kjent som "ballongmannen", og han skuffa ikkje ungane denne gongen heller! Her var det både ballongtriks, ballongdyr og ballonggitar (!), i samband med andakta han hadde. I tillegg song barnekoret tøfFOGNnådig av full hals på ein flott måte!

Som vanleg var det livleg i spise- og trekningsdelen av basaren. Samstundes virka det kanskje som om ungane var litt roligare enn vanleg på grunn av stor spenning knytta til kveldens hovudgevinst, ein iPad mini! Om dette var grunnen til at det kom inn så mykje pengar til NLM sitt misjonsarbeid er vanskeleg å seie. Det som er sikkert er at både iPaden og alle dei andre gevinstane hadde fått bein å gå på når kvelden var omme, og siste linje av "Med Jesus vil eg fara" var sunge...

Under er nokre bilete frå den rekordstore basaren!

Flott påsketur!

Fredag før palmesøndag tok, tradisjon tru, heile Fogn oppvekstsenter ut på påsketur! Som tidlegare år var destinasjonen uteplassen bak Rasmus sitt drivhus, der sporleik, grilling av pølser, koking av egg, songstund og fri leik sto på programmet. Etter særs sprikande vèrmeldingar i forkant, var det gledeleg å sjå sola i store deler av dei tre timane turen varte! No er det altså påskeferie for skuleungane, medan barnehagen tek ferie frå onsdag 16. april.

Under er ein fyldig bildeserie frå den flotte turen! 

Rapport frå årsmøtet i grendalaget

Kristoffer Østhus (t.v.) overtok som formann etter Jostein Østhus på årsmøtet i grendalaget.

Torsdag 10. april var det årsmøte i Fogn grendalag på oppvekstsenteret. I underkant av 30 personar møtte opp og fekk høyre eit interessant foredrag om fellesskap av danske Povl Nørgaard frå prosjektet Livleg Engasjement. Deretter var det tid for gryterett, ris og salat, før ein gjekk laus på sjølve årsmøtet.

Leiar i grendalaget, Jostein Østhus, las opp årsmeldinga før Malvin Sandanger orienterte frå kulturgruppa og Håvard Østhus fortalte om siste nytt frå Fogn.org. Merethe M. Kindingstad presenterte rekneskapen, før Mari-Anne Runestad leia val av nytt styre, varamedlemmar og leiar. Alle val vart gjennomført ved akklamasjon, og gav dette resultatet:

Kristoffer Østhus (leiar, vald inn i styret i 2014)
Arnstein Bøe (vald i 2014)
Janne Aano Bø (vald i 2014)
Joar Sandanger (vald i 2014)
Bjarne Bøe (vald i 2013)
Merethe M. Kindingstad (vald i 2013)
Mari-Anne Runestad (vald i 2013)
Johannes Hovda jr (1. varamedlem)
Kathrine Flesjå (2. varamedlem)

Til slutt vart kvelden avslutta med ei aldri så lita utlodning til inntekt for grendalaget.

JentelagsBASAR på fredag!

Fredag 11. april inviterer Jentelaget til basar kl. 18.00 på bedehuset!

• Lars Skjæveland (ballongmannen...) fortel frå Bibelen
• TØFF OG NÅDIG syng
• Kaffi, saft og boller blir servert
• Mange flotte gevinstar som bla. leiker, fruktkorger, iPad mini, snop, pledd og ikkje minst handarbeid laga av jentene sjølv.

På bileta under ser de nokre flotte egg jentene har tova.

Alle er hjarteleg velkomne!

Helsing leiarane i Jentelaget 

(Tekst/Foto: Janne Aano Bø)