Vi song jula inn!

View fullsize

Emma Grønås syng solo med Tøff og Nådig i bakgrunnen.

Søndag 15. desember var dagen då mange på Fogn fekk skikkeleg julestemning! Då vart nemleg jula sungen inn i kyrkja, og både juletre og julesongar var på plass! Mange hadde møtt opp og fekk høyre flott song av barnekoret Tøff og Nådig, Fognakoret, Dag Olav Sæbøvåg og tvillingane Sarah og Leah Sandanger. I tillegg var det mykje fellessong, der alle songane var henta frå den heilt nye salmeboka. I denne har mellom anna Alf Prøysens "Julekveldsvise" fått plass, og organist Unni S Vignes fortalte historia bak både denne og "Du grønne glitrende tre god dag" før dei vart sungne. 

Etter seansen oppe i kyrkja var det kaffi, kaker og klementiner i kjellaren, der stemningen var stor med både pratesjuke vaksne og ungar som gjerne fekk vere oppe litt lengre enn vanleg denne kvelden...

Under er eit klipp frå då tvillingane song, og tre bilete frå kvelden.

Juleverkstad på skulen

Torsdag og fredag i veke 50 var det tid for årets juleverkstad på Fogn oppvekstsenter. Dette er ein lang tradisjon, og i år kom elevane heim med eigenproduserte kaker, kransar, esker og sjølvdyppa lys! 

Barnehagen bidrog med Lussekattar på fredag, då dei kom gåande inn i flott Lucia-tog. I tillegg var desse yngste borna på oppvekstsenteret med på den årvisse julegrauten i lunsjtider på fredag. Stor stas og god stemning!

Nokre av bileta under syner elevane i stor aktivitet i gymsalen. Dette er eit av høgdepunkta kvart år, nemleg opp til ein time stikkball i gymsalen ved slutten av kvar økt... 

Kva er nytt?

View fullsize

Det har gått nesten fire år sidan Fogn.org vart lansert, 17. mars 2010. Sidan den gongen har sida sett meir eller mindre heilt lik ut, og det er på høg tid med ei oppdatering. Nokre av dei viktigaste endringane kan du lesa om under.

Betre støtte for smarttelefon og nettbrett
I mars 2010 var det ingen som hadde nettbrett, fordi Apple sin iPad ikkje var lansert enno...  I dag kjem omlag 50% av besøka til Fogn.org frå smarttelefonar og nettbrett, og det er viktig at desse får same funksjonalitet som besøkjande frå PC. Den nye sida er dynamisk og endrer storleik på bilete, tekst og layout, alt etter kor stor skjerm du besøkjer oss på. I tillegg skal alle no kunne sjå seriar med bilete som vert lagt ut, noko som ikkje var tilfelle med den gamle løysinga.

Kommentarar
For snart to år sidan prøvde vi oss med kommentarfunksjon under sakene på gamle Fogn.org. Denne funksjonen vart brukt av fleire, men på grunn av tekniske utfordringar på den gamle sida forsvant denne moglegheiten nokså fort. No er det igjen mogleg å kommentera dei ulike sakene som vert lagt ut. Dei som ynskjer å nytte seg av dette kan logge inn med Facebook, Twitter eller Googlekontoen sin når dei legg inn kommentar. Om du ikkje nytter nokon av dei tre alternativa, kan du registrera deg som brukar av kommentarfeltet ved å klikka alternativet "Squarespace" når du vil legga inn kommentaren din. Alle kommentarar vert godkjent av moderator før dei vert publiserte på Fogn.org. Det tek normalt ikkje meir enn ein time frå ein kommentar er lagt inn, før den er gjort offentleg på sida vår. Resten av reglane for kommentarar kan du lese ved å klikke HER.
Om du ynskjer å få beskjed om nye kommentarar under ein eller fleire saker, kan du klikke på "subscribe via e-mail" etter at du har klikka på "comment".

Deling på Facebook og Twitter
Nye Fogn.org har utvida støtte for sosiale medier. På alle nye innlegg finn du ein knapp det står "share" på, noko som gjer at du lett kan "lika" innlegget på Facebook og Twitter.

Instagram og Twitter på framsida
Nede på den nye startsida ligg det to nye felt, merka med "Fogn.org på Instagram" og "Fogn.org på Twitter". Her kjem dei siste innlegga til Fogn.org på desse to sosiale mediene automatisk opp. Dette er ein kjapp og enkel måte å få ut informasjon og enkle bilete på. Har du eit bilete som burde vore lagt ut på Instagramkontoen vår, er det berre å merke det med @fognorg, så vil biletet kunna bli publisert i løpet av kun kort tid.

Lamma frå den gamle sida har no blitt bytta ut

Kosmetiske endringar
Dei gamle lamma har mista plassen sin til fordel for ein nye heading som syner dei fire årstidene på Fogn. I tillegg ligg menyen no vassrett under headingen, i staden for i ei liste til venstre på sida, slik det var før. Det er i tillegg fleire små endringar reint utsjånadsmessig, som til dømes nye bilete til lenker med oppdatert ruteinformasjon, lenke for vèrmelding ++.

Meld inn arrangement frå kalendersida
Hjartet i Fogn.org er kalenderen. Denne har ein sentral plass òg på den nye sida, og ei liste over komande arrangement ligg på framsida. I tillegg kan du klikke på menyvalet "Kalender" for å få opp enno fleire arrangement. På botnen av denne sida, er det lagt inn eit skjema der folk kan melde frå om arrangement som skal inn på kalenderen. Før måtte folk nytte menyvalet "kontakt oss" for dette.
 

Dette var ei oversikt over dei største endringane på nye Fogn.org. Vi set stor pris på tilbakemelding, tips og råd frå brukarane våre! Dette kan skrivast inn som kommentarar under denne saka, eller meldast via menyvalet "kontakt oss". 

Reklame på Fogn.org

På årsmøtet i Fogn grendalag, vart det fremja ynskje om at bedrifter og næringslivet kunne få profilera seg på Fogn.org. Dette har styret i grendalaget teke tak i, og sender ut "pressemeldinga" under:

---------------------------------------------------------

Grendalaget har no opna for at det er mogleg for at bedrifter og næringslivet kan få profilera seg på Fogn.org. 

Dette er ei todelt sak. Næringslivet kan få presentera seg for lokalbefolkningen, samstundes som at grendalaget kan tena nokre kroner og fortsatt oppretthalda nettsida Fogn.org. 

Dei som ynskjer å vere med på dette, har fylgjande to alternativ:


1. Firmanamn på liste 
Bedrifta kan få firmanamn på ei liste i undermenyen "våre støttespelarar". Firmanamnet kan fungere som ein link, dersom firma har eiga nettside eller vil ha meir utfyllande info på ei underside på Fogn.org.

Dette kostar 1500 kr per år. 


2. Annonse på framsida + Firmanamn på liste
Bedrifta kan få eiga annonse (kan fungere som lenke) på framsida på Fogn.org. I tillegg vert bedriftene som går inn på denne avtalen nemnd først i lista over "våre støttespelarar". Annonse vil bli plassert i venstre sidestolpe på sida, i den rekkefølga bedrifter melder si interesse. Dersom det ikkje vert plass til fleire annonsar der, vert resten plassert i botnen. Storleiken på annonse er maks 180px x 180px. 

Dette kostar 4000 kr per år. Inkludert i prisen er produksjon av annonse, om dette er ynskjeleg.



Spørsmål og bestilling knytta til dette går til redaktør på Fogn.org, Håvard Østhus. Han kan nås på mail hosthus@gmail.com og telefon 93 44 59 13. 


---------------------------------------------------------

Unik video frå uvèret

View fullsize

Stillbilde frå videoen du kan sjå under.

Som vi skreiv om før helga, var det store naturkrefter i sving på torsdag og fredag. Vi la ut nokre bilete, og oppfordra folk til å bidra med sine blinkskudd, og serien har blitt oppdatert med fleire nye foto. I tillegg var det eit par karar som sendte inn video som er teken opp i Sæbøvåg då stormen sto på som verst. Desse videoane syner godt kva dimensjon uvèret hadde, og vil kunne vere gode å vise til i framtida, når folk ikkje trur på historiene om monsterbølgjer som slo over kai og molo i Sæbøvåg. Det må og nemnast både kai og molo i Sæbøvåg fekk store skader under påkjenninga. Alt av treverk på kaien rauk med, og den ytterste betongdelen av moloen har sige ned etter at store massar er skylt vekk frå fundamentet. Vi veit ikkje vegen vidare med desse skadene, men har fått opplyst at Båtforeningen undersøkjer moglegheita for å få delar av skadane dekka gjennom naturskadefondet.
Vi har, for ordens skuld, klippa videobidraga saman til ein film. I tillegg er lyden skrudd ned frå originalopptaka, då den intense og høge lyden av vind fort kunne kome til å øydeleggja eindel datahøgtalarar...
Tusen takk til Joar Sandanger og Gisle Torgersen, som både fekk dette på film, og delte filmane med alle som klikkar seg innom Fogn.org!

Mykje vèr på Fogn

View fullsize

Uvèr i Sæbøvåg. Foto: Gisle Torgersen

Ekstremvèret som har herja i Sør-Noreg i det siste har så absolutt gjort seg gjeldande på Fogn. Fleire tre har blåst over ende, sjøen har gått svært så kvit, og torsdag ettermiddag var fleire hus på Bø utan straum etter at eit tre hadde blåst over straumlinja. Dette gjorde og at vegen over Varland måtte stengjast i ein liten periode, men Lyse kom fort og ordna opp i dette. 

I serien under ser de ein del bilete av vèret dei siste dagane. No lavar snøen ned, så det siste biletet er nok ikkje knipsa enno. Send inn ditt bilete til hosthus@gmail.com eller via mobil til 93445913, og så hamnar det i serien under!