Besto syng - konsert i Fogn kyrkje

/

Fredag 22. november kl 18 vert det konsert i kyrkja på Fogn. Solveig Sørheim Eikanes, syster av Sondre dyrlege, syng og spelar trøorgel. Med seg har ho mann og spelemann Ingemund Eikanes, samt Steinar Aalvik, frittalande slektning med nase for humor. Konserten er i hovudsak bygd på songar Solveig lærte av besto si, Solveig Trå, derav navnet på konserten. Songar som besto vaks opp med på Haukogarden på Neteland i Steinsdalen. Ei og anna religiøs folketone frå Etne vert det også. 

Kort om artistane: 

Solveig Sørheim Eikanes.
Har ei over snittet interesse for trøorgel, og som konsekvens har ho også over snittet mange av dei. Ho er utdanna i komposisjon og kyrkjemusikk ved Griegakademiet i Bergen. Har i mange år vore organist i kyrkjene i Etne, men er i dag frilansar med kunstnarstipend. Ho har gitt ut boka «Di gamle songadne» om folk og musikktradisjonar i Etne. 

Ingemund Eikanes. 
Økofilosofisk jorddyrkar og god på norskopplæring av framandspråklege. Han spelar banjo i Bergen Mandolinband, og i Lady Hardanger. Er også å sjå i contrybandet Makalaust frå tid til anna. I denne konserten trakterar han i tillegg til banjo, klarinett, munnspel, gitar og fiolin. Han kan og til tider bryta ut i song. 

Steinar Aalvik.
Elles medverkar Steinar Aalvik. Småskala mjølkeprodusent frå Etne, men har morsfolket sitt frå Haokogarden, slik som «besto». Han er skribent og forteljar på hobbybasis. Under konserten kjem han med ujamne mellomrom til å reisa seg opp og seia slikt som gjer at folk lite vil vita kva dei skal tru.

Bli med og spel sjakk!

/

Liker du å spele sjakk? Er du god i sjakk? Eller kan du ikkje spela sjakk i det heile? Uansett kan Fogn IL sitt nye tilbod passa for deg!

Onsdag 23. oktober kl. 18.00-19.30 blir første samling med sjakkspeling arrangert i foajeen på Fogn oppvekstsenter. Dette er for alle, både vaksne og barn frå og med 5. klasse. Tilbodet vil fortsetje annakvar onsdag framover.

NB! I tillegg til sjakk annakvar onsdag, har Fogn IL også starta opp med volleyball annakvar tysdag denne hausten.

Velkommen til både sjakkspeling, volleyball og andre tilbod frå Fogn IL!

Feira for 300 seriekampar!

/

Då Fogn IL sitt A-lag i fotball tok imot stavangerlaget Siddis 2 i sesongens siste heimekamp, var det ikkje berre spel og resultat som var i fokus. Før kampen vart det nemleg delt ut pokal til Fognakeeper Trond Egil Sivertsen, som no har bikka 300 seriekampar for dei mørkeblå! I pausen vart det også sett fram ei kake med bilete av Trond Egil på, frå den etterkvart så omtala reportasjen i Aftenbladet, der keeperen omtala seg som verdas beste - i si vektklasse.

Trond Egil ligg no på ein flott 5. plass på adelskalenderen, og han har berre 7 kampar å ta igjen på nr. 4, Arne Eike. Dei tre som ligg på topp er Berge Sandanger med 329 kampar, Sigve Bøe med 335 og Jakob Bø med 421 kampar.

Sjølve kampen var svært jamn og spanande! Stillinga til pause var 2-2 etter mål av Jonas Halsne og Lars Heggeland Krumsvik. Kampen kunne vippa begge vegar i 2. omgang, men diverre for heimelaget var det dei rosa frå Stavanger som til slutt kunne juble for 3-2 og siger. Med det er sesongen over for Fogn sin del, som ender på 5. eller 6. plass, avhengig av korleis Buøy 2 gjer det i sin siste kamp.

Klart for toppturar i år igjen!

/

Også i år arrangerer Fogn IL 4- og 7-toppstur på Fogn, og denne gongen er turane lagt til søndag 29. september. Ein treng ikkje å melde seg på, og kan berre møte rett opp ved start.

Litt informasjon om turane:

Start 7-toppsturen: I Auglendsdalen (Hovda) kl.12.00

Start 4-toppsturen: Frå skulen kl. 12.30

Turen går frå Hovda til fylgjande sju toppar: Eikhaug, Borgaråsen, Himråsen, Peråsen, Domfjellet, Ørnakula og Varhaug. 4-toppsturen går over dei fire siste toppane i 7-toppsturløypa. Målgong er ved Kyrkja .

Det vert delt ut ein liten overrasking på fleire av toppane. Turen går i flott kulturlandskap og utsikten frå toppane gjev fantastisk utsyn over heile Ryfylke.

Spørsmål om turen kan rettast til Helge M Iversen, mobilnr 41085524.