Kyrkjebasar på laurdag

Etter avlysing i koronaåret 2020 er det igjen klart for basar i Fogn kyrkje, laurdag 6. november kl. 18.30!

Basaren vert gjennomført i kyrkjekjellaren og Inger Lise Hovda Dobbe kjem og inspirerer og informerer om Misjonsalliansen sitt arbeid i Ecuador, i tillegg til song av barnekoret TøfFOGNådig. Elles vert det loddsal, kaffi, gjærbakst og pølser.

Halvparten av inntektene frå loddsalet går til misjonsprosjektet og resten går til oppgradering av kyrkjekjellaren.

Velkommen!

Ansvarskomiteen i kyrkja

Sykkelparkeringa på plass!

El-syklist Erlend Grøtta Giske er godt nøgd med den nye parkeringa!

Etter at el-syklar har blitt “allemannseige” er det fleire som lar bilen stå og heller tek beina fatt når dei skal til ferjekaien på Fogn. Her har det lenge vore dårleg med parkeringsplass for alle typar syklar, men det har det no vorte ordna opp i, etter initiativ frå Fogn grendalag!

Grendalaget har spelt på lag med Vegvesenet (som tek rekninga), Gordon Sunde (som teikna påbygget) og Østhus Bygg og Maskin (som har utført sjølve jobben). No er parkeringa klar til bruk, under tak ved venterommet på kaien!

Totalprisen for det heile er omlag 100 000 kroner, og viser at ein kan koma langt med nokså begrensa midler, når ein samarbeider og tenkjer kreativt!

TV-aksjon søndag 24. oktober

Årets TV-aksjon går av stabelen søndag 24. oktober. På Fogn vert det innsamling med bøsser søndag ettermiddag frå ca. 13.00-16.00. I bøssene er det kontanter som gjeld, men det er råd å vippsa og gje på anna vis.

I år er det PLAN INTERNATIONAL som får midlane frå NRK-aksjonen. BARN, IKKE BRUD er parolen for innsamlinga. PLAN er religiøst og partipolitisk nøytral og har jobba med å hjelpa born sidan 1937. Midlane frå innsamlinga skal nyttast til å hjelpa jenter frå tvangsekteskap i ung alder.

Tekst: Ottar Sandanger

Velkommen til solidaritetsaksjon på oppvekstsenteret!

Så er det tid for vår årlege solidaritetsaksjonen og på oppvekstsenteret er vi alt i gang med førebuingane! Vi inviterer alle til å bli med på aksjonsdagen torsdag 28. oktober kl. 16.15-18.15!

Dette året går pengane til eit skuleprosjekt i Kokrobite i Ghana. Skulane her har lite eller ingenting utstyr og barna sit gjerne på golvet i store grupper på 40 - 60 born når dei går på skulen.

I fleire landsbyar har dei ikkje skulebygg og undervisninga må føregå ute. Pengane vi samlar inn, skal gå til å gjere ferdig eit skulebygg i Kokrobite. Jorunn Helland som driv prosjektet Education Gives Hope, kjem og fortel oss meir.

På aksjonsdagen blir det sal av middag og kaker, du kan kjøpe lodd på basar og delta på mange kjekke aktivitetar.

Velkommen til solidaritetsaksjonen!

(Skrive av Fogn oppvekstsenter ved Hilde Folkvord Juul)