Mange glimt frå Fognaløp og Fognameisterskap!

Søndag 1. september var det igjen tid for det årlege Fognaløpet og Fognameisterskapet. Først ut var løpet, der ein også i år kunne velgja mellom ein heil og ein “halv” runde rundt øya. Lilly C vann jenteklassen og Josef Bø vann gutteklassen på den halve runden. Dei sprang på henholdsvis 30,02 og 23,38. På den heile runden gjorde fam. Iversen reint bord, ved Anna og Kristian Sandanger Iversen. Dei sprang på tidene 54,17 og 42,46.

Deretter var det tid for 60-meter, lengdehopp og kast med liten ball for barn i alle aldrar. Mykje god innsats, mange smil og særs god stemning!

Sjå ein fyldig serie med bilete under. Bileta er knipsa av Mallin Sandanger Iversen, Julie Bø, Jørgen Bø og Håvard Østhus.

Informasjon om kommune- og fylkestingsval

Måndag 9. september er det klart for kommune- og fylkestingsval i heile Noreg. På Fogn er vallokalet som vanleg på Fogn oppvekstsenter, der ein også kan stemma i kyrkjevalet. Lokalet er ope frå klokka 13.00-18.00.

Nytt av året er at det skal vera elektronisk registrering av manntalslista, ikkje manuell registrering som tidlegare. For at det skal gå raskare og enklare å avgi stemme, er det difor ein fordel om folk har med seg valkortet som dei har fått i posten. Det vil sjølvsagt vere mogleg å stemme utan valkort, men det vil då ta hakket meir tid.

Velkommen til å bruke di stemme!

Fognameisterskap og Fognaløp til helga!

Søndag 1. september går årets Fognaløp og -meisterskap av stabelen. Kl 13.00 går startskotet for 5 og 10 km løypa, og idrettslaget oppfordrer alle (uansett alder) som liker å springe eller gå fort til å bli med. Startavgift for dei over 16 år er 100,- det vert premiering til vinnarar i dame- og herreklasse på begge distansar. I målområdet vert det som vanleg god stemning, frukt og grønt!

Det tradisjonsrike Fognameistermeisterskapet for born i alle aldrar starter kl.14.30, og her er det premiering til alle. Velkommen til store og små!

Godt vær, oppmøte, stemning og resultat!

Kulturbasaren på Erås, som vart arrangert for 11 . året på rad denne helga, fekk flotte rammer i nydeleg seinsommarvèr, og med over 80 personar innom vart det veldig god stemning på plenen mellom museet og løa på Erås. Vanlegvis plar jo basaren å vera innandørs, men denne gongen trakk dei aller fleste, naturleg nok, ut i sola. Her fekk dei høyre Elise Lunde fortelje om prosjektet ho er med og driv blant borna i Bolivia, og dei fekk vere med på loddtrekning både etter åresal og i basarbok. Det var også høve til å kjøpe forundringspakkar til inntekt for borna i Bolivia.

Engasjementet for saka var stor, også i forkant, og 7. klassingane Sarah, Leah, Thea og Mathilde hadde til saman samla inn nesten 3000 kroner til prosjektet gjennom sal av leiker og anna før basaren, og forundringspakkar på sjølve basardagen! Eit imponerande resultat til prosjektet, som de kan lese meir om ved å klikke HER.

Til saman kom det inn omlag 17 000 kroner til den gode saka, og når folk i tillegg fekk ei flott oppleving, kan ein ikkje konkludera med anna enn at kulturbasaren framleis er liv laga, og vel så det!

Sjå fleire bilete under (foto: Anders Sandanger):

Redaktøren takkar av

Kristian Sandanger Iversen, som har vore redaktør for Fogn.org dei to siste åra, har no takka for seg, grunna at han har byrja som elev på skuleskipet Gann. Då vert det, naturleg nok, vanskeleg å fylgja opp den lokale nettsida vår.

Vi vil takka Kristian for den flotte jobben han har gjort dei siste åra, og ynskjer han lukke til på vidaregåande skule! Så skal vi ikkje sjå vekk frå at vi ser meir til Kristian i Fogn.org-samanheng i framtida!

Gamleredaktøren Håvard Østhus tek over ansvaret for Fogn.org i ein overgangsperiode, fram til ei meir permanent løysing er på plass. Dersom nokon har tips til kven som kan overta ansvaret, er det berre å tipse oss om dette!

Kulturbasar på Erås til helga

På laurdag 24. august vert den 11. kulturbasaren i rekka arrangert ved Erås Museum. Museet opnar klokka 13.00, og så vert det basardel frå klokka 14.30. Inntektene frå basaren går til Elise Lunde sitt prosjekt i Bolivia, og det vert gitt informasjon om prosjektet før loddsal. Det vert også musikal og sal av kaker/kaffi og forundringspakkar.

Vi er takksame for gevinstar til basaren.

Alle er hjarteleg velkomne!