Tour of Norway for kids TIL FOGN!

/

Under årsmøtet i grendalaget, onsdag 29. mars, vart det offentleggjort at Noregs største sykkelritt for barn, Tour of Norway for kids, kjem til Fogn måndag 10. juli 2017! Det er Fogn Handel med Ivar Opsal i spissen, som har arbeida med dette, i og med at Joker er hovudsponsor i rittet. 

I 2016 var Tour of Norway for kids innom 56 stadar i Noreg, men at dei kjem til ei øy, og ikkje minst ei såpass lita øy som Fogn, verkar nokså unikt. Dei kjem med eit ferdig opplegg med sykkelritt for ulike aldersklassar, proff ramme rundt det heile, premiar til alle og utlodning av flotte gevinstar mot slutten av arrangementet. TV2 har også faste innslag frå Tour of Norway for kids, på sine sendingar frå Tour de France. 

Meir informasjon om dette arrangementet, som nok vil lokka mange familiar på besøk til Fogn, kjem ut over våren. I mellomtida kan de lesa meir om arrangementet på sykkelrittets eigne nettsider ved å klikka HER.

Rapport frå årsmøtet i grendalaget

/

Omlag 65 medlemmer møtte fram då Fogn grendalag inviterte til årsmøte i foajeen på Fogn oppvekstsenter, onsdag 29. mars klokka 18.30. Samanlikna med dei siste årsmøta i laget, var dette stort frammøte, og det kunne virka som om mange kom for å høyra meir om moglegheita for fiberutbygging på Fogn. Representantar frå Lyse var nemleg inviterte til møtet for å informere om  framdrifta i eit prosjekt knytta til "bygdefiber" til Fogn. Dei frammøtte fekk sjå eit kart over Fogn der dei ulike grøftene var teikna inn, i tillegg til ein presentasjon av kva for ulike tilbod Lyse kan gi, knytta til internett, TV og telefoni. Ordførar Henrik Halleland var også invitert til møtet, og han fortalte litt om korleis det låg an med det kommunale fiberprosjektet, som det vart løyvd omlag 10 millionar kroner til for to år sidan. Ordføraren kunne fortelja at det var mange uavklarte ting enno, men han var interessert i å få mest mogleg ut av pengane, og skulle ta med seg innspela frå årsmøtet i Fogn grendalag vidare. 

Det neste som skjer i fibersaka, er at Lyse vil samarbeide med Vegvesenet, knytta til asfaltering av Fogn, slik at dei kan gjennomføre dei aktuelle vegkryssingane i samband med at den nye asfalten kjem i løpet av våren/sommaren. I tillegg vil det verta eit salsmøte der Lyse informerer og får folk til å teikna seg på bindande lister for fiber, slik at dei veit kva dei har å forholda seg til. Lyse vil nemleg gå inn med 18 000 kroner per tilknytning i prosjektet.

Elles informerte Jon Olav Runestad litt om situasjonen i arbeidsgruppa som er sett ned for å arbeida med Øyfast. Her er det representantar frå fleire øyar i kommunen, og dei registrerer at det vert dyrare og dyrare å drive ferjesamband. Gruppa sakna gjerne litt meir engasjement knytta til Øyfast, mellom anna frå folket på Fogn, noko enkelte meinte kunne ha med eit godt ferjetilbod å gjera. 

Sjølve årsmøtet vart gjennomført utan den heilt store dramatikken. Både årsmelding og rekneskap gjekk gjennom utan dei store kommentarane, og valnemnda si innstilling til nytt styre gjekk rett gjennom. Det nye styret for grendalaget ser då slik ut:

Kristoffer Østhus - Leiar - 1 år
Solfrid Torgersen - 2 år
Heidi Bø Sangedal - 2 år
Kathrine Flesjå - 2 år
Joar Sandanger - 1 år
Arnstein Bøe - 1 år
Håvard Østhus - 1 år
Ingeborg Bøe Rolfsen - Vara - 1 år
Merete M Kindingstad - Vara - 1 år

Elles vart Margit Bøe valt til nytt medlem for 3 år i valnemnda, der Øyvind Sandanger (2 år att) og Jakob Bø (1 år att) sit frå før, og Ottar Sandanger vart valt til revisor.

Møtet vart, som vanleg, avslutta med ein liten utlodning til inntekt for grendalaget.

Hugs årsmøte i grendalaget på onsdag!

/

Onsdag 29. mars er det klart for årsmøte i Fogn grendalag. Møtet vert i foajeen på Fogn oppvekstsenter, og her er noko av det du kan forventa deg, om du tek turen til møtet som startar klokka 18.30:

  • Servering av pizza, kaffi og frukt
  • Informasjon om mogleg fiberutbygging på Fogn
  • Årsmøtesaker som styreval, årsmelding og rekneskap
  • Utlodning til inntekt for grendalaget (ta gjerne med ein gevinst:)

Alle er hjarteleg velkomne!

Interessert i betre internettlinje?

/

I løpet av veke 12 vil representantar frå Fogn grendalag koma rundt på dørene i både hus og hytter på Fogn, for å få oversikt over kor mange som er interesserte i å knytta seg til eit mogleg fibernett for rask internettlinje inn/ut av huset/hytta. Fiber taklar heilt andre hastigheiter enn dei nettlinjene som finnest på Fogn per i dag, og no vil Lyse finna ut om det er marknad for å satsa på Fogn. I den aktuelle fiberrn kan Lyse levera både internett, TV og telefoni.

Dei som skriv seg opp på desse listene, binder seg IKKJE til å faktisk seie ja til tilbodet om fiber, dette er berre ei undersøking for å sjå om folk verkar interesserte eller ikkje.

Dersom representantane frå grendalaget kjem til tomt hus/hytte, så finnest det lister på Joker Fogn som folk kan skriva seg på, dersom dei er interesserte i dette med fiber. 

Det kjem meir informasjon frå Lyse om mogleg fiberutbygging på Fogn, under grendalaget sitt årsmøte onsdag 29. mars klokka 18.30 på Fogn oppvekstsenter.