Positivt folkemøte om Øyfast!

Omlag 55 personar møtte opp i foajeen på Fogn oppvekstsenter då Grendalaget inviterte til folkemøte om Øyfast. Joar Sandanger, som er medlem av grendalagsstyret, ynskja velkomen, før ordførar Henrik Halleland fekk ordet. Halleland gjekk gjennom ein presentasjon frå IRIS der ein får sjå kva Øyfast går ut på, og korleis finansieringsgrunnlaget er. Politikar Jon Olav Runestad supplerte ordføraren, før det var tid for tilbakemeldingar og spørsmål frå salen. 

Her var meiningane mange, og det var ikkje berre "halleluja-stemning" knytta til prosjektet. Fleire trakk fram utfordringar knytta til dette med høge betalingssatsar for å passera bommen mellom Fogn og Finnøy, i tillegg til bekymringar knytta til eit redusert hurtigbåttilbod. Likevel var det eit overveldande fleirtal av dei frammøtte som rakk handa i veret mot slutten av folkemøtet, då Joar Sandanger ba dei rette opp handa, dei som ville "gå for Øyfast". Grendalagsleiar Kristoffer talte 44 hender for og ingen mot i den uhøgtidlege avstemminga. 

Mange tok som sagt ordet under møtet, og her er nokre sitat frå kvelden:

"Fastlandsforbindelse er undervurdert."
Henrik Halleland

"For mange år sidan hadde vi det veldig bra med båtar på Byre. Vi såg ikkje at vi trengte noko meir, men då såg vi ikkje framover. Sjå på oss i dag. Fogn står i fare for å hamna i same situasjon som Bokn og Byre om dei ikkje får til dette prosjektet"
Gudmund Byre

"Å mista hurtigbåten ville vore tragisk"
Ottar Sandanger

"Vi veit ikkje korleis framtida ser ut. Kan hurtigbåtar då gå på batteri? Kvar er kommunesenteret vårt då? Kor mange av dagens kommunar må vi køyre gjennom for å kome til det nye senteret? Vi har ikkje alle svara i dag".
Gordon Sunde

"Mange seier at det er dyrt med 150 kroner i bompenger til Finnøy, men vi må hugse på at ferja ikkje er gratis den heller. Vi betalar nesten like mykje når vi reiser heile familien med ferja til Finnøy"
Øyvind Sandanger

"Vi kan ikkje ha alle svar og fasiten her i dag. Vi kan ikkje diskutera detaljene. Då vert det som om vi planlegg eit stort bygg, men vert ståande fast fordi vi diskuterer kva for ein tapet som skal vere på barnerommet".
Joar Sandanger

Velkommen til folkemøte om Øyfast!

Fogn Grendalag inviterer til folkemøte vedr. Øyfast og IRIS-rapporten som er blitt utført på oppdrag fra Finnøy Kommune.

Møtet vert på Oppvekstsenteret tysdag 9. februar kl. 19.00.

Ordførar Henrik Halleland og vår eigen Jon Olav Runestad m.fl. kjem for å informera.

Kva meiner du om Øyfast? Bom? Ferjer? Bruer? Kom og sei di meining, eller berre kom for å bli litt visare i saka - forhåpentlegvis...

Hjarteleg velkommen!

Arr: Fogn Grendalag

Båtførarkurs og eksamen, alt på ein dag på Fogn!

I og med at vi bur på ei øy med vatn på alle kantar, er det kjekt å kunne ferdast i båt på sjøen. Utan båtførarbevis kan ein i dag berre føre ein mindre båt med liten motor. Er båten over 8 meter, eller motoren over 25 hk, må ein ha båtførarbevis , så lenge ein er født etter 1. januar 1980. Difor er det blitt meir og meir vanleg med båtførarkurs, der ein får intensiv opplæring, med påfylgjande eksamen. Grendalaget arrangerte eit slikt kurs her på Fogn for nokre år sidan, og no kjem det tilbod om eit nytt kurs, dersom behovet er tilstades.

Jarleiv Bjørklund er overstyrmann, og sertifisert til å ha slike kurs. Han kan koma til Fogn ein helgedag i vår for å gjennomføra 6 timars intensiv opplæring, der den siste timen går med til eksamen. Kurset kostar 1500,- og i tillegg kjem det ei eksamensavgift på 685,- 

På kurset får du mellom anna læra om:

• Navigering
• Godt sjømannskap
• Signaler for sikker navigering
• Ord og uttrykk brukt på sjøen
• Sjøens lovar og regler
• Grunnleggande navigasjon
• Sjøkart
• Kompass
• Sjømerker
• Fyr og lykter
• Bruk av instrumenter og seilas i kartet

Kurset vert gjennomført i eit klasserom på oppvekstsenteret, og ein tek altså eksamen direkte etter kurset. Jarleiv melder også om at kurset har ein "bestått garanti".

I første omgang vil vi høyre om det er mange som er interesserte i å vere med på eit slikt kurs i vår. Deltakarane må ha fylt 14 år når kurset vert avholdt. 14-åringar kan også ta eksamen, men beviset vert ikkje sendt ut før dei er 16 år. Det er ikkje nokon øvre aldersgrense, og det er anbefalt å ta eit slikt kurs sjølv om du er født før 1980. Kurset må vera betalt på førehand, informasjon om betaling kjem til dei som melder seg på.

Alle som er interesserte i å vere med på eit slikt kurs, kan sende ein sms til Kjell Terje Roverud på 901 47 811, og melde frå om si interesse. Så kjem det meir informasjon etter kvart.

Bidraga tikkar inn!

Grendalaget har, som vi tidlegare skreiv om, annonsert ein konkurranse der vi vil kåra årets beste vinterbilete frå Fogn! Fristen for innsending av bilete er 1. mars, men vi har alt fått mange fine bidrag! Desse ser du i serien under. Men det er framleis plass til mange fleire bilete! Har du knipsa eit du er godt nøgd med, eller kanskje du fangar eit flott motiv i løpet av februar månad? Send det i så fall inn til fogngrendalag@gmail.com, merk mailen med "Vinterbilete" og skriv kven som har teke bilete, i tillegg til kvar biletet er knipsa.

No er det litt tryggare på Fogn!

Helselaget og idrettslaget på Fogn hadde laurdag 16.januar invitert til kurs i HLR og bruk av hjartestartar. Me haddebesøk av Ronny Fjelde som leia oss gjennom kurset. Det var 14 deltakerar og me hadde praktiske øvelsar kombinert med erfaring og teori frå Ronny som er ein erfaren ambulansesjåfør. Me øvde først på hjarte, lungeredning som no er 30 kompresjonar og 2 innblåsingar.

Deretter viste han oss i bruk av hjartestartar og me øvde med dokker og treningshjartestarterar. Det var godt å kunne trykke litt på maskinen og bli kjent med den. Dette gjere ein tryggare i ein situasjon kor ein verkeleg treng å bruke den.

På Fogn har me hjartestartar ved Fogn oppvekstsenter og på Joker Fogn. Den på skulen er tilgjengeleg alltid og du finn den på toalettet  ved sida av garderobeinngangensom vender mot fotballbingen. Alle som treng den kan hente den og ved å trykke inn påknappen  til maskinen vil den instruere deg i kva du skal gjere. Ein treng ikkje å ha gått på kurs for å bruke maskinen.

Den ved butikken er tilgjengeleg i butikkens åpningstid og ligg på kontoret.

Den neste månaden har me fått låne to dokker og to hjartestarterar til trening. Desse ligg på skulen og ved å ta kontakt med Reidunn i helselaget eller Heidi i idrettslaget kan enkeltpersonar, bedrifter eller lag låne dette utstyret for trening.

Det viktige å gjere om du finn ein livlaus person er å varsle det vil seie ringe 113, starte HLR (30x2) og evt få nokon til å hente hjartestartaren. Når du ringer 113 har dei der ei liste over namn på Fogn som dei ringer til.

 Tekst: Heidi Bø Sangedal                               Foto: Øyvind Sandanger

Grendalaget vil premiera årets vinterbilete!

Snøen er i ferd med å smelta vekk for denne gong, etter eit par veker med kaldt vèr, skøyteis og etterkvart nok snø til å både gå langrenn og renna på akebrett. Når det i tillegg har vore sol frå skyfri himmel fleire dagar, så vert det knipsa mange fine bilete i slike periodar.

Grendalaget vil ha ein konkurranse der Fogn.org sine lesarar skal stemma fram årets vinterbilete frå Fogn. Fotografen som vinn kåringa, vil få overrekt ein kopi av vinnarbiletet forstørra på ei aluminiumsplate under årsmøte i grendalaget i april.

Fram til og med 1. mars kan ein senda inn bidrag til konkurransen. Dersom det er veldig mange bidrag, vil ein jury nedsett av grendalagsstyret plukka ut dei kandidatane som er med i "finalen", og vert presentert på Fogn.org, der ein kan stemma på sin favoritt.

Ein kan delta ved å senda bilete til fogngrendalag@gmail.com, og merke e-posten med "Vinterbilete". Hugs å skrive kven som har knipsa biletet og kvar det er teke.

Så no er det berre å bla i bileta frå dei siste vekene, eller håpe på ein ny kuldeperiode før fristen 1. mars. Eller kanskje eit typisk vinterbilete frå Fogn ikkje nødvendigvis må ha snø eller is på seg? Her er det berre å finna fram kreativiteten og bli med i konkurransen!