Juleverkstad på oppvekstsenteret

Torsdag 10. og fredag 11. desember var det igjen tid for juleverkstad på Fogn oppvekstsenter. Juleverkstaden er ein årelang tradisjon, og det er heilt sikkert mange av dei som er føresette til borna i dag, som har både gode minner og fysiske gjenstandar som stammar frå denne førjulsaktiviteten. I år skulle elevane innom fire stasjonar med ulikt innhald. Her var baking av julekaker, snekring av juletre beståande av rekved, liming av mosaikk på glaslykter og sying av ulike filtgjenstandar. Barnehagen kom rundt til stasjonane på torsdagen, ikledd sine Luciakostymer, og delte ut eigenbakte lussekattar. Under julegrauten på fredag var også barnehagen med, slik at heile oppvekstsenteret åt saman i foajeen denne dagen. 

Under er ein fyldig serie med bilete frå eit av høgdepunkta i adventstida for mange Fognbuar!

Vellukka eldrefest i kyrkja!

Onsdag 9. desember inviterte Fogn helselag pensjonistar med fylgje til eldrefest i kyrkjekjellaren. Og at denne festen har blitt svært så populær vart tydeleg gjennom at dei første gjestene kom i god tid før klokka seks, sjølv om festen ikkje skulle starta før halv sju... Då klokka nærma seg det offisielle starttidspunktet var lokalet alt fylt opp av festkledde eldre som lytta til vakre tonar frå "Trekkspelkameratane", koste seg med gløgg, og drøste med kvarandre!

Helselaget, som arrangerer denne festen utan nokon form for inngangspengar, stilte med både middag og dessert, beståande av røykt svinekam og riskrem med ikkje mindre enn tre mandler i. Då maten var eten, skulle eigentleg Jon Arne Helgøy stått for underhaldninga, men han hadde rett og slett mista stemmen, og måtte difor melde avbud (men han har alt lova å gjere det han kan for å stilla neste år..). I Jon Arne sitt fravær vart det Reidunn Østhus som "steppa inn", og fortalte om bakgrunnen for eindel av dei kjende julesongane våre. Det vart også høgtlesing av juleevangeliet, og Fognakoret var med og song fleire songar. Som om ikkje julestemningen alt var god nok, vart det også tid til juletregang før folk etterkvart gjekk kvar til sitt, vel vitande om at no står jula verkeleg for døra!

Under er nokre fleire bilete frå festen og førebuingane til denne, knipsa av Anne Strøm Østhus.

TV-Vest med flott program om Fogn!

Reporter Veronica Simonè Fjeld rapporterer mellom anna frå Joker Fogn i dette programmet. 
Foto: Skjermbilete frå TV-Vest

I august var reporter Veronica Simonè Fjeld og kameramann Tommy Rørvik på Fogn i to dagar for å gjera opptak til ein episode i TV-Vest sin programserie "Øyhopping". Tysdag 1. desember vart programmet frå Fogn sendt på lufta, og vi fekk sjå reportasjar frå både butikken, oppvekstsenteret, museet og ein aldri så liten "hjemme-hos" reportasje frå familien Øyvind og Ingunn Sandanger! Til saman vart dette veldig god reklame for Fogn, og det er berre å dela videoen vidare til folk som enno ikkje har fått sjå kor flott vi har det her! Programmet er nemleg lagt ut på nett av TV-Vest, og du kan sjå det ved å klikka nede til venstre i videovindauget under!

PS! I byrjinga av programmet seier reportar Veronica at det tek omlag ein halv time med ferja til Fogn. Vi som bur her veit at turen er unnagjort på eit lite kvarter, så ikkje la reisevegen skremma dykk...

Knusing av lecablokker i kyrkja på fredag!

Ja, det kan vere at det er ei spesiell overskrift, og ja, det kan godt vere at dette med knusing av lecablokker ikkje er det viktigaste som skal skje i kyrkja på fredag. Men overskrifta fekk nok eindel til å klikke seg inn på denne saka, så då kan de like godt lese litt meir om det som skal føregå!

"Konsert og drøsekveld" har Torolf Nordbø kalla samlinga som startar i Fogn kyrkje, fredag 4. desember klokka 20.00. Torolf sjølv, som kanskje er best kjent i rolla som "Han innante" kjem til å bidra med song, gitar og munnspel, saman med vår eigen Dag Olav Sæbøvåg som også stiller med song og gitar! Men ingen av desse har, så langt vi veit, planar om å knusa lecablokker. Det har derimot danske Øyvind Borgsø, som tidlegare var gjengkriminell i Oslo og på topp innan kampsport. I dag er han diakon og veiledar i bøn og kristen meditasjon. Torolf vil ha ein samtale med Øyvind om "reisa hans", og Øyvind vil i tillegg knusa lecablokker for oss!

Inngongspengar: 150 kroner for vaksne, born (5-17 år) betalar 50 kroner. Maks 300 kroner per familie. 

Alle er hjarteleg velkomne!

Guttelagsbasar og reflekstur til helga!

Helga 27.-29. november skjer det fleire ting "litt utanom det vanlege" på Fogn. Når sant skal seiast er det eigentleg veldig vanleg at guttelaget arrangerer sin basar fredag før første søndag i advent, og refleksturen same helga byrjar også å verte ein tradisjon. Men begge desse arrangementa skjer altså no til helga, og dei er opne for alle som vil koma.

Guttelagsbasar - Fredag 27. november klokka 18.00
Basaren er som vanleg på bedehuset, og det er Lars Skjæveland som skal ha andakt (også det er nokså vanleg). Barnekoret TøfFOGNådig bidreg med song, og det vert gratis boller, saft og kaffi i kjellaren etterpå. Det vert loddsal til inntekt for Norsk Luthersk Misjonssamband sitt misjons- og bistandsarbeid.

Reflekstur - Laurdag 28. november klokka 17.30
Møt opp på skulen og gå løypa via Peråsen, Høgaste, Varhaug og kyrkja. Det er lurt å ha med lommelykt, for merkinga består i refleksar som er hengt opp i førevegen. 
Arr: Fogn IL

I tillegg er det gudsteneste i kyrkja på søndag klokka 10.30. Dette er den såkalla "lys-vaken-gudstenesten", der 6. klassingar frå heile kommunen overnattar i kyrkja frå laurdag til søndag, og er med og arrangerer gudsteneste søndag morgon.

Nye ferjeruter på trappene - høyring

Det er utarbeida eit nytt forslag til ferjeruter som i utgangspunktet skulle tre i kraft når Sandsfjord bru opna. No har det seg slik at denne brua opnar alt førstkomande fredag, og det er nok lite truleg at nye ferjeruter er klare alt då. Det som vi heller kan rekna med er at dei nye rutene vil tre i kraft ein gong på våren, då dei er sendt ut med høyringsfrist 15. januar.

Det står ein artikkel om dei nye ferjerutene på Aftenbladet sine nettsider. Denne kan de lesa ved å klikka HER.

Dei nye rutene kan du klikka på og sjå lenger ned i denne saka. Dersom du har innspel og forslag kan desse tas direkte med leiar i grendalaget, Kristoffer Østhus, på mail: kristoffer@osthus.no. Grendalaget vil deretter behandle denne saka og kome med ei uttale overfor fylket knytta til forslaget til ferjerutene.

Klikk på dei aktuelle rutene under:

Forslag ferjeruter måndag til laurdag
Forslag ferjeruter søndag