15. oktober er refleksdagen!

15. oktober er den nasjonale refleksdagen i regi av Trygg Trafikk og Statens Vegvesen. Barna i barnehagen og elevane i skulen på Fogn har alle fått utdelt ein fin refleks i dag, der det står "I am a star". Borna er stjerner, og med refleks lyser dei opp mest som ei stjerne når mellom anna lys frå bilar treff dei!

Ordninga med refleksdagen er 10 år i år, og det er nok ikkje utan grunn at denne dagen har vorte markert år etter år. Refleks er med og redder liv i trafikken, og Statens Vegvesen kan opplysa om at ein bilførar får i gjennomsnitt fem gonger lengre tid til å reagera dersom ein fotgjengar har på seg refleks i haustmørket, enn dersom han ikkje brukte refleks. Det vil seie at utan refleks vil ein bilist som køyrer i 50 km/t ha to sekunder på å unngå å treffa ein fotgjengar, medan han vil ha 10 sekunder på å unngå det dersom fotgjengaren har på seg refleks.

I 5.-7. klasse gjorde vi i dag eit lite eksperiment. Vi skrudde av alt lyset, trakk for gardinene og så tok vi eit bar bilete av elevane i mørket. Vi brukte blitsen på telefonen, og så skulle vi sjå om refleksane kom tydeleg fram på biletet. Som de ser på biletet over, er det tydeleg at refleksen viser godt igjen, samanlikna med alt det andre som er på bileta...

Trygg Trafikk oppfordrer også til å bruka mange refleksar, slik at ein blir sett både forfra og bakfra. Refleksvest kan vera vell og bra, men dersom borna har på seg skulesekk på ryggen, vil denne dekka mykje av vesten. Difor kan det vere ein idè å hengje ein refleks på sjølve ryggsekken.

I tillegg må dei av oss som køyrer bil, traktor og liknande vere ekstra på vakt no når vi går inn i "mørketida". Dette gjeld sjølvsagt heile døgnet, men vi på oppvekstsenteret vil minna om at skulestart er klokka 08.15 og skuleslutt er som oftast klokka 13.00 eller 13.55. Då er det fleire elevar som ferdast langs vegen, anten gåande, syklande eller medan dei går ut og inn av buss og bilar ved oppvekstsenteret. Då er det viktig å vise ekstra merksemd og syte for at ein ikkje har dårleg tid til eller frå ei ferje e.l.

Ha ein god, og strålande haust!

Håvard Østhus
rektor - Fogn oppvekstsenter

Fogn knuste Finnøy 2!

Fogn - Finnøy 2: 5-1 (1-1): Søndag 4. oktober var det klart for årets siste heimekamp for Fogn IL sitt a-lag, og det var Finnøy 2 som kom på besøk denne flotte haustdagen!

Det var Finnøy 2 som tok leiinga, då midtstoppar Erik Torger Johannesen sette ballen i nota for bortelaget. Denne stillinga såg lenge ut til å halda seg til pause, men like før halvtid utlikna Rasmus Robson Skartveit for heimelaget. Ei skåring som heilt sikkert smakte godt for Skartveit, som fram til i fjor spelte nettopp for dei raudkledte frå Finnøy.

Etter pause verka det som om det berre var eit lag på banen. Fogn viste fram flott angrepsfotball, og skåra ikkje mindre enn fire mål. Dei to første kom ved veteran Jakob Bø, medan Malvin Skartveit, også han tidlegare Finnøyspelar, sette dei to siste.

Dette referatet er skrive ved hjelp av rapportar frå Jørgen Bø jr, og Joar Sandanger. Sistnemnde har også skrive nokre ord frå supportarane etter den siste heimekampen:

"Supportarane takkar for ein flott 2015-sesong med masse god fotball, underhaldning, spenning og engasjement! Vi ynskjer lukke til med vintertreninga og kvilepausen,  og ser fram til ny sesongoppkøyring og seriekampar på Fogn stadion i året som kjem!"

Fogn kjem no til å enda på 4. eller 5. plass denne sesongen. Finnøy sitt A-lag tapte mot Riska 3 måndag kveld, så naboøyas beste menn ender på 2. plass i år. Finnøy 2 på si side ender på 7. plass, og nest sist i pulja.
 

Pris til Joker Fogn!

Me har ikveld hatt fint besøk ifrå fleire av nærbutikkane i kommunen, Leif Klovning frå Joker Utsira, Lars Helgeland frå Merkur, Heidi Skifjell frå Finnøy Næringshage og Heinz Bieri frå Joker/Kjøpmannshuset. Dei fekk omvisning i butikken vår og ein rundtur på Fogn. Avslutta kvelden med god middag på Runestad laga av Kathrine Flesjå. Det var forskjellige innteressante og lærerike innlegg frå fleire av dei frammøtte.

I sommar har Heidi Skifjell frå Næringshagen lagt ned ein stor innsats og laga ein brukarundersøkelse i Joker/Nærbutikkane.
Til vår store glede blei me i Joker Fogn kåra som "Beste sesongbutikk i Finnøy Kommune sommaren 2015"
Det som blei trekt fram var:
-Kundetilfredshet
-Testkjøp og Kundeuttalelser
-Butikken som sosial arena
-Økning i antall kunder
-Salgsvekst

Tusen takk til våre dyktige ansatte. Og ikkje minst tusen takk til våre fantastiske kunder for ein sånn tilbakemelding.
Me er veldigt stolte!

Tekst: Fogn Handel v/ Øyvind Sandanger

God stemning på årets topptur!

Mange hadde stilt opp i Auglendsdalen klokka 12.00, sundag formiddag. Det var godt turvér, sola skein og mange blide ansikt var å sjå. Fyrste klippestasjon var Eikhaug, her kan ein sjå innover Fogn der løypa går opp og ned til ein er i mål på Varhaug. Alt regnet som var komt ned i løpet av veka gjorde at løypa var våt og sleip. Neste klippestasjon var Borgaråsen. Her delte Stavanger Instalasjon ut kvikklunsj og Felleskjøpet buffar, før turen gjekk til Himråsen. Det var heile 54 deltakere som gjekk denne lengste delen av toppturen.

På skulen var 34 deltakere klare klokka 13,  til 4-toppstur. Saman med 7-toppsturen gjekk turen opp til Peråsen, her sat Ole Johan med sjokolade fra Joker Fogn. På Erås var det saftstasjon. Gul og raud saft vart utdelt av Opsalnyhende, som også hadde laga ein kviss. Turen gjekk så opp til Domfjellet, for mange den tyngste og brattaste delen av løypa. På Ørnakula, høgaste punktet i løypa, fekk ein tomater fra Ståle Runestad og kvikklunsj fra Coopekstra. Målet var på Varhaug der Nordengros delte ut regnkåper, kulepennar, refleksbånd mm. Gåvekortet fra Kiwi Finnøy blei vunne av Ellen Runestad.

Fogn IL seier tusen takk til alle sponsorar og til dei som gjekk turen.

Tekst: Mallin Sandanger Iversen

Tid for 4- og 7-toppstur

Foto frå toppturane i 2014, knipsa av Kristian Sandanger Iversen.

Sundag 27.september er det klart for turdag på Fogn. For tredje året på rad arrangerer idrettslaget tur til sju utsiktspunkt på øya. 

Turen går over dei same toppane som tidlegare år, men rekkefølgjen av toppane er noko endra. Start på 7-toppsturen skjer på Hovda (Auglendsdalen) og ein går så til Eikhaugen, Borgaråsen og Himråsen. Vidare går turen til skulen og her er det óg start for dei som vel den kortare varianten med fire toppar. Frå butikken går ein så over Peråsen, Domfjellet, Ørnakulå og Varhaug.

Start 7-toppstur: kl.12.00-12.15 –  i Auglendsdalen

Start 4-toppstur: kl.13.00-13.15 – på skulen

I løpet av turen får du oppleve mykje flott natur og praktfull utsikt over heile Ryfylke, i alle himmelretningar. Den lengste turen er ca 10 km lang og går i flott kulturlandskap, gjennom skog, over beitemark og gjennom noe myrlendt terreng. 

Også i år har vi fått gåver, som vert utdelt i løpet av turen. I år er det Joker Fogn, Kiwi Finnøy, Coop Extra Finnøy, Stavanger Installasjon, Nor Engros, Felleskjøpet, Opsalnyhende og Ståle Runestad Tomatgartneri som gir ei lita overrasking til dei som deltek.

Tekst: Helge Magnar Iversen. Foto: Kristian Sandanger Iversen.

Stor fotballhelg for Fogn!

Dei aller fleste av dei aktive fotballspelarane frå Fogn var i aksjon denne helga. På laurdag var det nemleg ikkje mindre enn fire alderbestemte lag som deltok på ASAP-cup på Jørpeland, medan A-laget spelte heimekamp mot Riska 4 på søndag!

På laurdagen hadde idrettslaget leid inn båt frå Helgøy Skyssbåt, som frakta over 50 store og små Fognbuar frå Sørvåg til Jørpeland om morgonen, og attende om ettermiddagen. På ASAP cup var det over 120 påmeldte lag, og Fogn stilte altså med fire av desse. Laga var Fogn G6 (3-er fotball), Fogn G8, Fogn G9 og Fogn J9. Alle laga skåra mange mål, og spelarane såg ut til å vera godt nøgde. Stemninga vart ekstra god då kvar enkelt spelar vart lest opp og heidra på premieutdelinga like etter at siste kamp var spelt. Her vanka både medalje og fotballpumpe til kvar spelar, noko som såg ut til å falla i smak! På vegen heimover var alle einige om at det hadde vore ein flott dag... Kristian Sandanger Iversen var med mellom anna som fotograf. Han har knipsa mange bilete frå cup-en, som de kan sjå ved å klikke HER. Kristian laga også ein video frå premieutdelinga, som de kan sjå under.

Fogn IL - Riska 4: 4-2 (3-1). På søndag kom dei gulkledte Riskaspelarane på besøk til Fogn for å spele bortekamp i 7. divisjon. Riska 4 er eit av laga som låg nokså jamnt med Fogn før oppgjeret, så dette var ein typisk "sekspoengskamp". 

Fogn styrte kampen frå start, og tok tidleg leiinga då Malvin stakk gjennom til Håvard som kom først på ballen, som sneik seg inn høgt oppe i mål, 1-0!

Ikkje lenge etter vart leiinga dobla. Denne gongen var det Sergej som vart spelt fri og nesten åleine med keeper. Sergej var uegoistisk og spela ballen ut til Håvard som fekk ein enkel jobb med å breiside inn 2-0!

Og omgangen var berre omlag halvspelt då Fogn skulle få nok eit mål. Ole Jakob stal eit dårleg utspel på Riska si venstreside. Venstrebacken vart nytt som rundingsbøye før Ole Jakob skar inn foran midtstopparen og plasserte ballen lett i mål bak ein nokså passiv keeper, 3-0!

Hadde dette vært fotball på høgt nivå, kunne ein gjerne sagt at kampen langt på veg var avgjort på dette tidspunktet. Men i 7. divisjon er alt mogleg, så det var nok ingen som tenkte at "dette går lett no!". Riska var nemleg farleg frampå fleire gonger, og like før pause kom reduseringa etter eit fint langskot, 3-1!

I pausen var Fogn stort sett godt nøgde, både med spelet, skåringane og at det i all hovudsak berre var Riskaspelarane som klaga og kjefta på dommaren. Slik ville ein også halde fram, men det er nok uvisst om dommaren merka så mykje til at Fogn hadde vorte einige i pausen om å ikkje klaga på han. Etter pause vart det nemleg ein heil del temperatur på banen, men ikkje før Fogn hadde gått opp til tremåleseiing. Sigve slo eit frisparkinnlegg frå venstresida. Ballen vart stussa vidare av Jakob, og fann Ole Jakob på løp. Ole Jakob var roleg åleine med keeper, runda han, og sette ballen i nota frå skrå vinkel, 4-1!

Etter dette tok kampen fyr på skikkeleg, og dommaren måtte fleire gonger fram med det gule kortet for å straffe både munnbruk og harde taklingar. Til slutt kom også eit raudt kort til Fogn, etter at Sigve Bø si "rullegardin" gjekk ned i møte med ein sannsynlegvis nokså provoserande Riskaspelar. 

Med 11 mot 10 var det, naturleg nok, Riska 4 som tok over styringa i kampen. Dette gav også resultater i form av eit nytt flott langskot som fann nettmaskene, 4-2! Men sjølv om dei styrte kampen sleit dei med å koma til dei største sjansane. Kampen ebba difor ut med 4-2, eit resultat som gir eit nokså godt bilete av kampen!

No er Riska 4 så godt som distanserte på årets tabell, men Fogn må gjerne ha nokre poeng i dei to siste kampane denne sesongen for å behalde plassen. Kampane går mot Riska 3 på bortebane og Finnøy 2 på heimebane.

KAMPFAKTA:

Fogn sitt lag:
Trond Egil Sivertsen
Kristoffer Runestad
Sigve Bø
Martin Østhus
Pål Rune Grønås
Malvin Skartveit
Jakob Bø
Johannes Hovda jr
Ole Jakob Kjølvik
Sergej Kononov
Håvard Østhus

Benytta reserve:
Andreas Hagenes Bøe

Mål: Håvard (2), Ole Jakob (2)

Assists: Malvin, Sergej, Jakob

Gule kort: Sigve, Jakob, Pål

Rødt kort: Sigve