Tipp norske resultater i ski-VM 2015!

19. februar er det første konkurransedag under ski-VM 2015, som dette året vert arrangert i Falun i Sverige. At nordmennene kjem til å gjera det betre enn svenskane på deira heimebane er jo kjekt i seg sjølv, men all erfaring viser at VM vert enno kjekkare om du blir med på Fogn.org sin tippekonkurranse!

No er det ikkje dei store premiane som står på spel i tippekonkurransen, berre spør vinnar av fotball-vm-tippinga 2014, Olav Østhus. Her handlar det mykje om heider og ære, men heider og ære er jo ikkje til å kimsa av... 

På Fogn.org sin tippekonkurranse skal du tippe på alle øvelsane der Noreg har deltakarar. Du skal tippe kva som vert den beste norske plasseringa, og kva for norsk utøvar som gjer det best. Du får 3 poeng for rett utøvar, og 2 poeng om du tipper rett plassering (medalje, 4.-6. plass eller 7. plass el. dårligare). I tillegg får du 3 ekstrapoeng om du tipper nøyaktig rett medalje (gull, sølv eller bronse).

Alle som deltek vil få tilgong til alle innsendte svar, og resultatlista i tippekonkurransen vil verta oppdatert gjennom heile meisterskapet. Frist for innlevering er torsdag 19. februar klokka 12.59, men lever gjerne svar i god tid før dette...

Klikk HER for å kome til skjema der ein fyller inn svar!

Fagdag om middelalderen på skulen

Onsdag 4. februar var det fagdag om middelalderen på skuledelen av Fogn oppvekstsenter. Elevane jobba med ulike oppgåver knytta til denne tidsepoken, og det vart produsert teikningar, våpenskjold, leirskåler, middelalderhorn, flotte presentasjonar og filmen "Middelaldernytt". I tillegg kom det storfint besøk frå Finnøy og Ryfylke Livsgnist, då tre av skodespelarane i spelet om Ogmund Finnson tok turen til Fogn! Desse bidrog ved å vere i miljøet under fagdagen, i tillegg til at dei kommenterte elevane sine framføringar og sjølv spelte eit lite skodespel mot slutten av dagen.

Sjå fleire bilete, og få linken til filmen "Middelaldernytt" på Fogn oppvekstsenter sine nettsider ved å klikka HER.

Posten skal ikkje berre fram...

Arnstein Bøe har på vegne av Fogn grendalag vore i kontakt med distribusjonsavdelingen for posten. Det har nemleg vore nokre tilbakemeldingar om mykje feillevering av post, i tillegg til at det har vore litt uklårt kva ein eigentleg kan forvente frå landposttenesta ut over berre det å levere post.

Arnstein kan fortelja at distribusjonsavdelinga skal ta tak i feilleveringsutfordringa, og kan elles fortelja at dette om landposttenesta:

• Ein gong i veka (måndag-fredag) kan du få utført ulike posttenester heimefrå. Det einaste du må gjere er å feste den gule signalbrikka på postkassen din, slik at postbudet ser at du ynskjer å få noko utført. Om du ikkje har signalbrikka, får du denne ved å henvdende deg til postbudet eller postens kundeservice.
• På laurdag kan du få utført inn- og utbetalingar ved oppmøte i postkassen.
• Du kan kjøpa frimerke av postbudet. Per dato har ikkje landpostbudet kortlesar i bilen, så dette må betalast med kontanter. Det vert arbeida med å få tak i terminal/kortlesar til bilane.
• Har du DNB-konto kan du gjere innskudd og uttak hjå landpostbudet.
• Elles kan du få utlevert eller innlevert rekomanderte brev, verdibrev, oppkrav og alle typar pakkar og brev.

Arnstein vil, på vegne av grendalaget, ha tilbakemeldingar dersom det som står skrive ovanfor ikkje fungerer i praksis. Han kan nås på mail fogngrendalag@gmail.com eller telefon 45476251.

Berre for damer!

Torsdag 12. februar vert det inspirasjonssamling i kyrkjekjellaren, og det er ei samling berre for damer, fortel ein av intiativtakarane, Monika Stensland til Fogn.org. Monika fortel vidare at samlinga startar klokka 19.00, og at temaet er Tro = Relasjon.

Christiane Weiss Tornes, psykiatrisk sjukepleiar frå Ålgård, deltek på samlinga. I tillegg kjem Gunn Berit Soldal og les eigne dikt. Elles vert det song, musikk, salatbuffet, kaffi og drøs!

Samlinga er eit samarbeidsprosjekt mellom Normisjon og ei lokal gruppe beståande av Monika, Anne, Kjersti, Reidun og Unni, og damer i alle aldrar er hjarteleg velkomne til inspirerande kvinnefelleskap!

Ein prest frå Fogn!

På søndag skjedde det noko som, mildt sagt, ikkje skjer så veldig ofte. Ein Fognbu vart ordinert til prest! No bur denne karen rett nok ikkje på Fogn lenger, men "ein gong Fognbu, alltid Fognbu"... Mannen det er snakk om, er Ola Aasland Vold, som vart ordinert i Domkyrkja i Oslo.

Fogn.org kontakta Ola og gratulerte med ordinasjonen. Vi gjennomførte også eit lite SMS-intervju med den nybakte presten, som viste seg å vera "rask på tommelen" og imponerte med utfyllande og raske svar!

Gratulerer med ordinasjonen!
Tusen takk for det!

Det er jo ikkje kvar dag folk frå Fogn vert prest, kjenner du til om det er andre enn  deg?
Hm... Eg kjem ikkje på nokon i farta. Det kan jo tenkjast at det finnest eit register med den slags informasjon, men eg veit i så fall ikkje kvar det er å finna... Men det er nok ikkje så sannsynleg at eg er den første frå Fogn som vert prest.

Det er ikkje godt å seie. Men no er i alle fall du blitt prest, kan du fortelje litt om vegen fram dit?
Ja, det er jo ei nokså lang utdanning. Eg har gått fem år på Fjellhaug Internasjonale Høgskole (FIH) som heitte Fjellhaug Misjonshøgskole då eg byrja. Deretter gjekk eg eitt år på Praktisk-teologisk seminar (PTS) ved Teologisk Fakultet på Blindern, Universitetet i Oslo. På Fjellhaug hadde eg litt ulike typar praksis, mellom anna i Nordmarkskapellet og i Indonesia. På PTS var eg i institusjonspraksis i Forsvaret, på Sessvollmoen, og den meir avsluttande stiftspraksisen hadde eg i Ullern kirke.

Og no på søndag vart du altså ordinert. Korleis var ordinasjonsgudstenesta?
Det var ein flott dag! Mange sendte helsingar, og det var stor stas! Eg kjende at eg var nervøs når prosesjonen var forbi og eg sette meg ned, men det løsna ein gong kring 2. vers i inngangssalma: "Kom, du Guds kjærleik, kom".
Eg hadde preika i Gudstenesta, men når det gjaldt den var eg nok meir nervøs i dagane før. På veg opp til preikestolen var fokuset meir på det eg skulle seia enn på korleis det ville gå.

Og kva er planane framover då?
No for tida avtener eg verneplikt som feltprest. Så får me sjå kva det blir til hausten. Me kjøpte nett eit hus på Fiskå, rett over vegen for Marita (kona) sine foreldre, og planen vår er å ha det som base i Noreg medan me reiser ut som misjonærar, men det er enno ikkje heilt spikra korleis dette blir.

Flotte greier. Tusen takk for intervjuet, og lukke til vidare!
Tusen takk for det!

I galleriet under er fleire bilete frå ordinasjonsgudstenesta. Takk til Ola si søster, Ester Alida, for desse bileta!

Tid for felles søndagstur!

Siste søndag i månaden står for døra, og idrettslaget vil starta opp med å arrangera felles søndagstur att! Leiar i Fogn IL, Heidi Bø Sangedal, fortel til Fogn.org at ein gjerne ville lagt opp til ski- eller skøytetur, men det ser ikkje ut til at forholda ligg til rette for dette... Difor vert det ein heilt vanleg søndagstur til Ørnakulå for dei som ynskjer det. Oppmøte vert ved kyrkja klokka 14.00.
Heidi avsluttar med å seie at denne turen kan vere ei påminning om at 2015 er friluftslivets år, så her bør ein ha gode grunnar for å halde seg heime...

Alle er hjarteleg velkomne til å bli med!