Vann lokaloppgjer!

Dei tre målskårarane, Johannes, Ivar og Jakob jublar etter kampslutt.

Fogn - Mastra 2: 3-0 (3-0). Etter å ha tapt knepent mot Finnøy i serieopninga, var det tid for revansj for A-laget i fotball då eit anna nabolag sto på motsatt banehalvdel, nemleg Mastra 2. Fredagens kamp var Fogns første heimekamp i årets seriespel, og for ein match det vart! Fogn hadde full kontroll i første omgang, og kunne skåra mange fleire mål enn dei tre det vart før dommaren blåste til pause. Både stenger og tverrliggar sto i vegen, men la oss ikkje dvele ved det som ikkje vart mål, la oss heller se nærmare på måla:

1-0: Corner frå venstresida etter massivt trykk mot bortelaget. Martin Østhus slår ein presis, innoverskrudd ball, som går over dei aller fleste, utanom Ivar Opsal som har lurt seg inn på bakerste stolpe. I duell med forsvaret tillet Ivar seg to forsøk på å få ballen over linja, og lukkast den andre gongen, 1-0!

2-0: Etter eit angrep trillar ballen bakover i 16-meteren til Mastra. Håvard Østhus får ei tå på ballen omlag samtidig som ein Mastraforsvarar tek både ballen og Håvard. Dommaren er klar i si sak: straffe! Jakob Bø stiller seg opp, tek eit kort tilløp, og plasserer ballen omlag så langt ut til venstre som det let seg gjera, 2-0!

3-0: Eit innlegg frå venstre vert klarert ut av feltet og inn i farleg område på ca. 25 meter. Der står Johannes Hovda jr og plukker opp "nedfallsfrukten", legg ballen til rette, og klemmer til med høyrefoten. Ballen fyk i mål til høgre for keeper, og den må ha truffe nettet i omlag same nettmaska som straffen til Jakob, 3-0!

I andre omgang tok Fogn "foten av gasspedalen", men kom til fleire store sjansar likevel. Nærast var nok Johannes Hovda då han traff stolpen etter eit raid og Sigve Bø då han heada like over etter eit fint innlegg frå høgre. Mastra hadde ingenting å fare med, noko som verkar rart etter at dei hadde vunne sine to første kampar, mellom anna mot Finnøy (3-1). 

Etter kampen var det god stemning både blant spelarar og publikum. Det er ikkje kvar heimekamp folket får sjå så fin fotball som Fogn viste i dag, særleg i 1. omgang. Når ein i tillegg registrerer at dette resultatet sender Fogn forbi Finnøy på tabellen, kan ein ikkje vere anna enn godt nøgd... 

Tilskodar Joar Sandanger sende ein mail til Fogn.org med både ein kommentar og ein filmsnutt med spelarropet etter kampen. Kommentaren kjem under, og videoen ser du i botnen av denne saka, saman med eit lite klipp frå den største sjansen i andre omgang. Takk til Joar!

"Kanskje naboane våre frå Rennesøy hadde i overkant sjølvtillit etter storsigeren mot Finnøy sist tysdag. På Fogn stadion luska dei nemlig slukøyra av banen i kveld etter å ha tapt 3-0 mot eit godt organisert og angrepsvillig Fognalag som gav oss tilskuarar topp underhaldning og fotballglede i nær 90 min.
Me takkar for kampen og ser fram til ein lovande sesong!"

Kampfakta

Fogns lag:
Trond Egil Sivertsen
Martin Østhus
Olav Østhus
Sigve Bø
Pål Rune Grønås
Ivar Opsal
Jakob Bø
Johannes Hovda jr
Håvard Østhus
Sergej Kononovs
Trond Arne Borgemyr

Reservar (alle benytta):
Kristoffer Runestad
Jon Østhus
Ørjan Klev Ladstein
Tobias Sunde
Vadim

Mål: Ivar, Jakob, Johannes
Assist: Martin, Håvard, Ingen
Gule kort: Pål Rune 

Konfirmasjon 2014

Laurdag 3. mai var det konfirmasjon i kyrkja på Fogn. Det var dei to staute karane Ørjan Bø Måkestad og John Sverre Sandanger som vart konfirmert, og sjølv om dei berre var to, vart det ein flott seremoni!

Janne Aano Bø tok nokre fine bilete frå Gudstenesta, og dei kan du sjå i serien under. Fogn.org gratulerer konfirmantane så mykje med dagen!

Så nær!

Finnøy - Fogn: 3-2 (1-1). Då Fogns debutant Sondre Søheim skåra etter berre eit minutt av kampen mot Finnøy, såg det svært lyst ut for bortelaget i mørkeblått. Diverre holdt det ikkje heilt inn, og Fogn gjekk på eit surt tap i serieopninga på Leikvoll.

Det har vore mykje snakk om denne kampen dei siste vekene. Finnøy har vore på treningsleir i Tyskland og brynt seg mot hard motstand, medan Fogn fekk testa seg mot Tasta i cupen på fredag. Kva for eit lag var eigentleg sterkast og kan smykke seg med tittelen "storebror", om berre for nokre dagar? Dette skulle avgjerast på Finnøy, mandag 28. april frå klokka 20.00. 

Fogn hadde ein debutant i Sondre Sørheim. Sondre er kanskje best kjent som han som spela rolla som "Iversen" i filmen "United" frå 2003. I denne filmen imponerte ungguten med sine fotballferdigheiter, noko han også gjorde då han gjesta ei Fogn-trening i fjor haust. Etter denne treninga har trenar Jakob Bø jobba hardt for å få Sondre til å signere for Fogn, og innsatsen gav resultater: Sondre debuterte mot Finnøy på mandag. Og for ein debut det blei! Ikkje berre skåra han Fogns første mål, han la og opp til det andre målet, i tillegg til å vere ein konstant trussel på si høyreside. Dersom Fogn får behalde denne stjerna, kan dei fort kome til å nå ambisjonane om å hamne på øvre halvdel av tabellen!

Tilbake til kampen. Etter at Sondre, assistert av Sergej, førte Fogn opp i leiinga, kom Finnøy tilbake og syte for at det sto 1-1 til pause. I 2. omgang skåra Finnøy først, før Sondre sentra til Jakob som skaut ballen i mål med venstrebeinet til 2-2. Dette hende omlag 10 minutter før slutt, og dei fleste trudde nok at bortelaget skulle få med seg minst eit poeng frå denne kampen. Diverre, for dei blåkledde, netta Finnøy då berre to minutter gjensto, slik at heimelaget tok sigeren med sifra 3-2, og får lov å kalla seg "storebror" i nokre dagar framover. Samstundes bør det nemnast at dei fleste objektive tilskodarar meinte at Fogn var det klart beste laget, og at dei produserte flest sjansar. Men no er det no ein gong slik at det er måla som tel, så får vi sjå om Fogn klarar å gjere det noko betre reint målmessig i årets første heimekamp i serien, som går av stabelen fredag 9. mai.

Kampfakta:

FOGNS LAG:

Trond Egil - Pål - Trond Arne - Olav - Martin - Sondre - Johannes - Jakob - Rolf - Asbjørn - Sergej

RESERVAR:

Ivar, Kristoffer, Harald (benytta) og Ørjan, Jon, Daniel (ubenytta).

FOGNS MÅL: Sondre og Jakob

FOGNS ASSISTS: Sergej og Sondre

Taxi på Fogn!

Thor Jansen er klar for køyreoppdrag!

Thor Jansen har no fått løyve til å ta køyreoppdrag på Fogn, evt. til Finnøy. Dette kunne vi lese på lappen som hamna i postkassane på Fogn torsdag 24. april. Fogn.org har snakka med Thor, og lurte mellom anna på om han hadde ein form for opningstider når det kom til køyreoppdrag. "Eg har sagt det slik at om du ringer etter klokka 12 om natta, så bør det stå om livet..." uttaler Thor før han legg til med ein humoristisk undertone: "Så får det heller vere opp til den og dei det gjeld å avgjere kor alvorleg det må vere for at det skal gjelde livet...".

Thor kan nås på telefon 92 41 98 70.

Cupeventyret over før det byrja...

Fogn - Tasta: 2-8 (2-3). Det såg svært lyst ut etter at både Jakob Bø og Trond Arne Borgemyr sette sine straffar før kampstart, slik at Fogn hadde to mål å gå på då dommaren blåste det heile i gong. Diverre var det sju mål for lite til å hamla opp med eit sterkt Tasta-lag.

På førehand var det venta ein hakket jevnare kamp, i og med at Fogn ofte gjer det godt på heimebane. Når Tasta kom med toppa mannskap, og hadde fått trent seg på naturgras mot Forsand i førre seriekamp, vart det aldri den heilt store spenninga i kampen. Det var tydeleg at dette var Fogns første graskamp for året, og Tastaspelarane virka til å vera mest komfortable på det, til april å vere, særs grønne graset. Når Fogn i tillegg gav vekk 3-4 mål på nokså stygge feil, var det liten tvil om kva for eit lag som skulle få lov til å gå inn i 1. runde i Rogalandscupen, og møte Hinna.

På den positive sida stilte Fogn med ein stor tropp med både unge og eldre spelarar. Fleire spelte sin første kamp for året, og Tobias Sunde fekk sin heimedebut som innbyttar. I tillegg var det fleire som meinte at det eigentleg var bra at dette braktapet kom i dag, så "vakna" spelarane litt til liv før den viktige seriestarten mot Finnøy, mandag 28. april (bortebane på Leikvoll)...

Fogn sitt lag:

Trond Egil - Pål Rune - Ivar - Olav - Martin - Rolf - Johannes - Sergej - Jakob - Håvard - Trond Arne

Benytta innbyttarar:

Kristoffer - Ørjan - Harald - Tobias - Jon

Nokre bilete frå kampen:

Årets første kamp på Fogn Stadion!

Etter fleire månadars venting er det endeleg den tida på året igjen, då Fogn sitt A-lag i fotball får på seg den blå drakta og kjemper for siger på heimebane! Årets første heimekamp er ein kvalifiseringsrunde til Rogalandscupen, og det er 5. divisjonslaget Tasta som står på motsett banehalvdel. Dette kan kanskje høyrast ut som "lett match" for bortelaget, som ligg to divisjonar over Fogn, men det er mange grunnar til at det ikkje nødvendigvis vert ein klar B på kupongen:

• Fogn gjorde det svært godt på heimebane i fjor, og tapte aldri med meir enn eit mål på eige gras.
• Dei to divisjonane som skiljer laga, gjer at Fogn får to straffspark før kampstart. Moglegheiten er altså til stades for ein "flying start".
• Graset ser kanskje flott ut, men det er ein nokså humpete bane i april. Forskjellen er at Fogn har trent på matta 2-3 gonger alt...
• Bruset frå heimepublikummet plar å gjere sjølv den mest frykta motstandar nokså overkommeleg for gutane i mørkeblått, og vi har ingen grunn til å tru at dette ikkje skjer også torsdag.

Kampen vert sparka i gong torsdag 23. april klokka 18.50, og skal du få med deg dei to straffesparka og all dramatikken må du ikkje kome eit sekund etter dette!

Det er som vanleg gratis å sjå på A-laget sine kampar, så her bør det bli mykje folk!