Vel gjennomført KOM-prosjekt av 7. klasse!

Torsdag kveld var det premiere på årets KOM-prosjekt i kulturstova. KOM-prosjektet er ein musikal med elevane frå 7. klasse i heile Finnøy kommune. Prosjektet har etterkvart lange tradisjonar, og er ein god arena der elevane får vist seg fram, og bind band til kvarandre uavhengig av kva øy ein kjem frå. 

Årets musikal hadde tittelen "Vinn eller forsvinn" og handla om eit TV-program i "Idol"-stil som kom til Finnøy for å ha audition. Mange prøvde lykka, men kom ikkje vidare i programmet. Ei av dei få som faktisk kom vidare, var Marit, som dei fleste meinte song nokså falskt. Det viste seg at TV-selskapet såg for seg å nytte Marit sine dårlege prestasjonar til å lokke sjåarar til skjermen, for å få meir reklameinntekter. Dette gjorde at venene til Marit måtte stille seg sjølv eindel spørsmål knytta til det etiske perspektivet i situasjonen. Kva er det eigentleg som betyr noko her i livet? Er det greit å vere med i ein slik konkurranse, eller skal ein berre forsvinna? 

I tillegg til premierekvelden, som fylte opp kulturstova til randen, gjennomførte 7. klasse to førestillingar til i løpet av fredagen, då skular og bornehagar i kommunen fekk kome å sjå kva dei hadde fått til. Resultatet var imponerande, særleg når ein tenkjer på at elevane har gjort størstedelen av arbeidet den siste veka, og så må vi ikkje gløyme at det er 12-13-åringar det er snakk om her!

Dei ni sjuendeklassingane frå Fogn deltok i aller høgaste grad til å gjere musikalen så god som den vart! Dei imponerte med skodespelarprestasjonar, songframføringar, pianospel, kulisseproduksjon og fleire andre små og store oppgåver! Fogn.org fekk snakka med fleire av elevane frå Fogn etter at det heile var over, og konklusjonen var einstemmig: Dette var knallkjekt!

Snart årsmøte i Fogn IL

Bilete frå "Hopp og sprett".

Fredag 21. mars klokka 18.00 er det igjen klart for årsmøte/årsfest i Fogn IL på oppvekstsenteret. Programmet er i korte trekk:

• Utdeling av vandrepokalar frå Fognameisterskapet 2013
• Jon Asgaut Flesjå, leiar av Finnøy idrettsråd blir med
• Informasjon frå dei ulike aktivitetane
• Pizza, is og kaffi
• Utlodning. Vi tek gjerne imot gevinstar
• Årsmøtesaker
  • Godkjenning av årsmelding (klikk HER for å lese årsmeldinga) og rekneskap
  • Val av nytt styre (kandidatar er spurde på førehand)
  • Ymse

Vel møtt til store og små!

Fleire debutantar i A-lagets første treningskamp

Forus og Gausel 2 - Fogn: 6-2 (3-0). At Fogn tapte kampen mot Forus og Gausel tysdag kveld, var ikkje på akkurat noko stor bombe. Fleire av fognaspelarane hadde til gode å spele fotball utandørs i 2014, i tillegg til at fleire av dei nokså faste spelarane hadde meldt forfall til årets første treningskamp. På den gledelege sida var det heile tre debutantar med i troppen, og både Vadim, Tobias og Asbjørn fekk vist at dei kan vera med og bidra til gode opplevingar på og rundt A-laget i sesongen som ligg framfor! Vi fekk ikkje knipsa eit bilete av Asbjørn før han forsvant ut av garderobedøra, men heldigvis poserte Vadim og Tobias villig på ferjeturen heim etter kampen...

Sjølve kampen var eigentleg jamnare enn resultatet, særleg til pause, kunne vitne om. Forus og Gausel var nok hakket betre enn Fogn, men dei skapte ikkje veldig mange sjansar utanom dei som førte til tellande resultat i målprotokollen. I andre omgang skåra Fogn to mål ved spissane Trond Arne og Håvard, men diverre netta heimelaget dobbelt så mange gonger, slik at sluttresultatet vart nokså klare 6-2. 

Dei siste åra har det ikkje vorte mange treningskampar for Fogn sin del. Difor var spelarane godt nøgde berre med å ha gjennomført tysdagens kamp, i tillegg til at ny kamp (mot Buøy 2) går av stabelen 18. mars. Når ein i også høyrer rykter om at nokså store stjerner vurderer å signere for Fogn IL i næraste framtid, kan ein ikkje vere anna enn optimistisk inn mot seriestarten mot Finnøy i slutten av april.

PS! Evigunge Kristoffer Runestad gjorde comeback i denne kampen, etter å ha vore utlånt til diverse klubbar i og rundt hovudstaden dei siste åra. Det vart eit gledeleg gjensyn med lynvingen, som ikkje ser ut til å ha teke nemneverdig skade av utlånsoppholdet.

Fogns lag: 

Trond Egil, Harald, Ivar, Vadim, Martin, Lars Olav, Jakob, Håvard, Ørjan, Sergej, Trond Arne

Benytta reservar: Asbjørn, Kristoffer, Rolf, Tobias

Ein nokså fuktig fredag...

Ein ny bekk pressa seg fram på ferjekaien.

Fredag 7. mars 2014 går inn i historiebøkene som ein av dei fuktigare dagane på Fogn. Det var meldt mykje regn, og dette slo så absolutt til. Gjennom heile natta regna det så mykje, at pendlarane som skulle reise med hurtigbåten klokka 06.20 måtte vassa i omlag 15 cm djupt vatn over heile kaien. Og regnet gav seg ikkje. Her vart mange midlertidige dammar og bekkar, som etterkvart minna meir om innsjøar og elver. I tillegg til å ha knipsa nokre bilete sjølv, har vi fått tilsendt ein video frå Øyvind Sandanger og eindel bilete frå Jørgen Bø jr. På denne måten kan vi dele nokre bevis på at det faktisk var så gale som folk kjem til å snakka om i tida framover... Sjå både bilete og video under!

Hopp og sprett!

Aktivitet og glede - ein god kombinasjon!

Kvar torsdag ettermiddag er det god gang i gymsalen på Fogn! Då samlar 10-20 born i alderen 0 år - 1. klasse seg til "Hopp og sprett", eller berre "Barnetrimmen", som arrangementet òg vert kalla. Når det i tillegg er ein sosial møtestad for dei føresette, så seier det seg nesten sjølv at dette er liv laga! Vi tok temperaturen på samlinga som gjekk av stabelen den 6. mars, og fann fort ut at det ikkje berre var ungane som fekk høve til hopp og sprett... Her måtte mange vere med å bidra, både som duefangande haukar, fiskespisande haiar, trøystande fredsmeklarar og ikkje minst sterke trekkhestar. Men sjølv om aktivitetsnivået var høgt i heile den timen samlinga varer, vart det tid til litt drøs med dei vaksne som hadde møtt opp. Denne dagen var det Gunhild Grønås som var ansvarleg, men ho kunne fortelje at det var Mallin Sandanger som var primus motor for "Hopp og sprett", der Fogn IL står som arrangør. Kor lenge dei har holdt på med slike samlingar var folk litt usikre på, men det kunne virka som om det har foregått i to periodar over tre år, og så har det vore ein liten pause mellom dei to periodane. Men no er det ingen konkret plan om pause, sjølv om den kanskje største eldsjela, Mallin, ikkje har nokre ungar i den aktuelle alderen etter sommaren. Fleire verkar til å stå klare til å ta over ansvaret for det positive tiltaket, som kanskje er ekstra viktig no for tida, då data, film og TV er med og bidreg til at ungane gjerne sit meir i ro. Det var i alle fall ikkje mange sekunder ungane på "Hopp og sprett" sat i ro, då dei var opptekne med å springe rundt gymsalen, hoppe frå scena, leikeslåss med kvarandre, hoppe tau og ha eit par meir organiserte leiker mot slutten av samlinga. Og då ungane etterkvart gjekk heim, glade og slitne, var det nok fleire godt nøgde føresette som såg fram til lite motstand i prosessen med å få dei unge og håpefulle i seng denne kvelden...

"Hopp og sprett" går av stabelen kvar torsdag klokka 17.00-18.00 fram til påske. Gymsalen er stor, så her er det plass til enno fleire, anten det er fastbuande, eller folk som tek med seg ungane inn til ei langhelg på Fogn!

Under ser de ein heil del bilete frå samlinga den 6. mars:

Saker til årsmøte i Grendalaget?

Formann i grendalaget, Jostein Østhus.

Torsdag 10. april vert det årsmøte i Fogn grendalag. I grendalaget sine vedtekter kan vi lese at "På årsmøtet skal laget handsama saker etter foreininga sine vedtekter, samt inkomne forslag frå medlemmar". Desse forslaga skal eigentleg vere sendt inn seinast 1. februar, men sidan årsmøtet er seinare enn vanleg, er fristen i år sett til 10. mars. Forslag kan leverast til leiar Jostein Østhus, anten per post, i handa eller på mail jostein.osthus@finnoy.kommune.no.

Elles kan det nemnast at grendalaget har invitert Povl Nørgaard frå prosjektet "Livleg engasjement" til å kome å ha innlegg på årsmøtet. Nørgaard har alt hatt eit møte med grendalaget og representantar frå næringsliv og frivillige lag og organisasjonar på Fogn. Referat frå dette møtet finn du ved å klikka HER.

Meir informasjon om årsmøtet kjem etterkvart som datoen nærmar seg.